Read Кыргыз тилиндеги Библия, 2004 Аюб 22 Bible Online

Аюб 22 - Кыргыз тилиндеги Библия, 2004 bible

Аюб 22

¹Теймандык Элипаз мындай деп жооп берди:

²«Адам Кудайга пайда келтире алмак беле? Акылдуу өзүнө пайда келтирет.

³Сенин адил болгонуңдан кудуреттүү Кудай кандай ырахат алмак эле? Өз жолуңду таза сактаганыңдан Ага кандай пайда?

⁴Ал сенден коркуп кетип, сени менен талашып-тартышмак беле? Сени менен соттошмок беле?

⁵Чын эле, сенин кыянаттыгың чоң болсо керек, сенин мыйзамсыздыгыңа чек жок болсо керек.

⁶Чын эле, сен эч нерсе бербей туруп, бир туугандарыңдан күрөө алсаң керек, ач-жылаңачтардын кийимин сыйрып алсаң керек.

⁷Суусаганга суу бербесең керек, ачкага нан бербесең керек.

⁸Ал эми алдуу-күчтүүгө жер берсең керек, ал жерге мансабы чоң киши отурукташса керек.

⁹Жесирлерди эч нерсе бербей кетирсең керек, жетимдерди куру кол калтырсаң керек.

¹⁰Ошон үчүн туш тарабыңа тузак коюлду, сени күтүлбөгөн коркунуч басты.

¹¹Же болбосо көзгө сайса көрүнгүс караңгылык каптады, ташкындаган сел астында калдың.

¹²Кудай асмандан да жогоруда эмеспи! Тээ бийиктеги жылдыздарды карачы, алар канчалык бийик!

¹³Сен болсо: “Кудай эмнени билет? Ал караңгылыктан бизди көрүп, соттой алмак беле?

¹⁴Булут – Анын пардасы, ошондуктан Ал эч нерсе көрбөйт, асман мейкиндигинде гана жүрөт”, – дейсиң.

¹⁵Сен, чын эле, байыркылардын жолун жолдоп жүрсөң керек. Ал жол менен мыйзамсыз адамдар жүрүшкөн,

¹⁶алардын негизинин астын суу каптаганда, алар мезгилсиз кырылышкан.

¹⁷Алар Кудайга: “Бизден оолак бол” – дешкен. Алар: “Кудуреттүү Кудай бизге эмне кыла алмак эле?” – дешкен.

¹⁸Бирок алардын үйлөрүн Ал мал-мүлккө толтурду. Бирок мыйзамсыздардын кеңеши менден алыс болсун!

¹⁹Адилдер көрүп кубанышты, такыбаа адам аларга:

²⁰“Душманыбыз кырылды, алардан эмне калса, ошону от жалмады”, – деп күлдү.

²¹Кудайга жакында, Аны менен элдеш, ушул аркылуу сага жакшылык келет.

²²Анын оозунан чыккан мыйзамды кабыл ал, Анын сөздөрүн көкүрөгүңө түйүп ал.

²³Эгерде кудуреттүү Кудайга кайрылсаң, анда кайра калыбыңа келесиң, үйүңдү мыйзамсыздыктан арылтасың.

²⁴Алтын сен үчүн топурактай, Опир алтындары суудагы таштардай болуп калат.

²⁵Кудуреттүү Кудай сенин алтының жана жаркыраган күмүшүң болот.

²⁶Ошондо сен кудуреттүү Кудайдан кубаныч аласың, Кудайга башыңды көтөрөсүң.

²⁷Сыйынасың, үнүңдү угат, сен да өз убадаларыңды орундатасың.

²⁸Бир нерсени ниет кыласың, ал ниетиң ишке ашат, жолуңа жарык чачырайт.

²⁹Кимдир бирөө кемсинтилгенде, сен: “Жогору көтөрүлүү”, – дейсиң. Ошондо Ал көңүлү чөккөндү куткарат.

³⁰Ал айыптуу адамды да куткарат. Ал адам сенин колуңдун тазалыгы менен куткарылат».