Read Кыргыз тилиндеги Библия, 2004 Аюб 23 Bible Online

Аюб 23 - Кыргыз тилиндеги Библия, 2004 bible

Аюб 23

¹Аюб мындай деген жооп айтты:

²«Бүгүн да менин сөзүм кайгылуу. Тарткан азаптарым онтоолорумдан оор.

³Оо, мен Аны кантип табарымды билсем кана, Анын тагына жакындай алсам кана!

⁴Анда мен анын алдында өз иштеримди айтып бермекмин, оозумду актана турган сөзгө толтуруп алмакмын.

⁵Анын мага эмне деп жооп берерин билип алмакмын, Анын мага эмне айтарын түшүнүп алмакмын.

⁶Кантип эле Ал эбегейсиз кудуреттүү болуп туруп, мени менен таймашсын? Жок, Ал антпейт! Ал мага көңүл буруп эле койсо кана!

⁷Ошондо адил адам Аны менен таймаша алмак, ошондо мен да өз Өкүмдарымдан түбөлүк азаттык алмакмын.

⁸Бирок мен чыгышка барсам да, Ал жок, батышка барсам да, Аны байкабайм.

⁹Түндүктөн издесем да, Аны таппайм, Ал түштүктө жашынып турабы дейин десем, ал жактан да көрүнбөйт.

¹⁰Бирок Ал менин жолумду билет. Мейли, мени сынап көрсүн, ошондо мен алтындай болуп чыгам.

¹¹Менин бутум Анын жолунда бекем турат. Анын жолун сактадым, эч жакка бурулбадым.

¹²Анын оозунан чыккан осуяттардан бурулуп кетпедим. Анын оозунан чыккан сөздөрдү өз эрежемден артык сактадым.

¹³Бирок Ал бекем экен. Аны ким жолдон чыгара алат? Ал Өз жүрөгүнүн каалаганын жасайт.

¹⁴Ошон үчүн Ал мага эмнени белгилеп койсо, ошону орундатат. Анын ушуга окшогон ойлору көп.

¹⁵Ошондуктан мен Анын алдында калтырайм, ойлоном жана Андан корком.

¹⁶Кудай жүрөгүмдү алсыратты, кудуреттүү Кудай мени коркутту.

¹⁷Мен эмне үчүн бул караңгылыктан мурун жок болбодум? Эмне үчүн Ал да менин жүзүмдөн караңгыны алып таштабады?