Read Кыргыз тилиндеги Библия, 2004 Аюб 27 Bible Online

Аюб 27 - Кыргыз тилиндеги Библия, 2004 bible

Аюб 27

¹Аюб маанилүү сөздөрүн улантып, мындай деди:

²«Мени акыйкаттыктан ажыраткан Кудай тирүү, жанымды кейиткен кудуреттүү Кудай тирүү.

³Жаным өзүмдө турганда, Кудайдын руху таноомдо турганда,

⁴менин оозум жалганды сүйлөбөйт, тилим калп айтпайт!

⁵Мен силерди адилеттүү деп эсептөөдөн алысмын. Өмүрүм өткөнчө өзүмдүн таза экендигимден танбайм.

⁶Мен өз чындыгымды бек кармадым, эми аны коё бербейм. Өмүрүм өткөнчө жүрөгүм мени жемелебейт.

⁷Душманым кара ниет адамдай болот, мага каршы чыккан адам мыйзамсыз адамдай болот.

⁸Анткени Кудай эки жүздүү кишинин жанын сууруп алганда, ал эмнеден үмүттөнмөк эле?

⁹Башына мүшкүл түшкөндө, Кудай анын зар-муңун укмак беле?

¹⁰Ал кудуреттүү Кудайдан сооронуч алмак беле? Ар убакта Кудайды чакырмак беле?

¹¹Кудайдын колунда эмне бар экенин силерге жарыялайм, бардыгын кармап туруучу Кудайдын колунда эмне бар экенин силерден жашырбайм.

¹²Мына, силер өзүңөр да бардыгын көрдүңөр! Сөз деп эле сүйлөй берүүнүн силерге эмне кереги бар?

¹³Мыйзамсыз адамдын Кудайдан тийген энчиси бул, зулумдардын кудуреттүү Кудайдан алган мурасы мындай:

¹⁴эгерде алардын уулдары көбөйсө, анда кылычтан өлүшөт. Урпактары нанга тойбойт.

¹⁵Артында калгандарды өлүм көргө түшүрөт, жесирлери ыйлабайт.

¹⁶Ал күмүштү топурактай жыйып алат, кийимди ылайдай көп даярдап алат.

¹⁷Даярдаганы менен, анын кийимин адил адам киет, күмүшү айыпсыз адамдын энчисине тиет.

¹⁸Ал өз үйүн күбө курттай курат, өз чатырын күзөтчүдөй жасап алат.

¹⁹Ал бай адам болуп уктайт, бирок турганда бай адам болуп турбайт. Көзүн ачса, ал мурункудай эмес.

²⁰Коркунучтар аны суудай каптайт, түн ичинде аны бороон учуруп кетет.

²¹Аны чыгыш шамалы көтөрүп учуруп кетет, ал аны турган жеринен учуруп кетет.

²²Ага жулкунуп кирет, анын колунан ал канчалык качууга аракет кылса да, ал аны аябайт.

²³Аны табалап кол чабышат, анын турган ордунан ага таң калып ышкырышат».