Read Кыргыз тилиндеги Библия, 2004 Аюб 28 Bible Online

Аюб 28 - Кыргыз тилиндеги Библия, 2004 bible

Аюб 28

¹«Чындыгында, күмүштүн кени бар, алтындын эритүүчү жайы бар.

²Темир жерден алынат. Жез таштан эритилип алынат.

³Адам караңгылыкка чек коёт, караңгылыкта, өлүм көлөкөсүндө кылдаттык менен таш издейт.

⁴Эч кимдин буту баспаган жерден кен казат, түпкүргө түшөт, адамдар жок жерде илинип, термелип турушат.

⁵Дан өскөн жердин түпкүрүндө от балбылдап жаткансыйт.

⁶Анын таштарынын арасынан сапфир табышат, ал жерден алтын кум чыгат.

⁷Ошол жакка барчу жолду жырткыч куш билбейт, аны айры куйруктун көзү көргөн эмес.

⁸Жаш арстандар аны тепсеген эмес, ал жол менен арстан баскан эмес.

⁹Ал гранит ташка колун сунат, тоолорду түп-тамыры менен омкорот.

¹⁰Аскаларды тешип жол чыгарат, анын көздөрү бардык асыл байлыктарды көрөт.

¹¹Агын суулардын агымын токтотот, жашыруун жаткандарды жарыкка чыгарат.

¹²Бирок акылмандык кайдан алынат? Акылдын жаткан жери кайда?

¹³Адам анын баасын билбейт, ал тирүүлөр жашаган жерден табылбайт.

¹⁴Түпкүр айтат: “Акыл менде эмес”, – деп, деңиз да: “Менде эмес”, – дейт.

¹⁵Аны алтынга ала албайсың, күмүшкө сатып ала албайсың.

¹⁶Ал Опирдин алтыны менен да, кымбат баалуу акак таш менен да, көк жакут менен да бааланбайт.

¹⁷Ага алтын да, тунук кристалл да тең келбейт, аны таза алтындан жасалган идиштерге да алмаша албайсың.

¹⁸Ал эми маржан менен берметтерди айтып өтүүнүн кажети да жок, акылмандыкка жетүү кыпкызыл лаалга жетүүдөн алда канча артык.

¹⁹Ага Эфиопиянын сары жакут таштары да тең келбейт. Ал таза алтын менен бааланбайт.

²⁰Анда акылмандык кайдан чыгат? Акылдын чыккан жери кайда?

²¹Ал бардык тирүү жандардын көзүнөн жашыруун, асман куштарына да көрүнбөйт.

²²Абадон менен өлүм: “Ал жөнүндөгү сөздү биз өз кулагыбыз менен уктук”, – дешет.

²³Анын жолун бир гана Кудай билет, анын орду бир гана Кудайга маалым.

²⁴Анткени Ал жердин түпкүрүнө чейин карап турат, асман астындагынын бардыгын көрүп турат.

²⁵Ал шамалга салмак берип жатканда, сууларды өлчөмү менен жайгаштырып жатканда,

²⁶жамгырга мыйзам берип жатканда, күркүрөгөн чагылгандын жолун түзүп жатканда,

²⁷аны көрдү жана көрсөттү, аны даярдады, сыноодон да өткөрдү.

²⁸Анан адамга мындай деп айтты: “Мына, акылмандык деген – Кудайдан коркуу, акыл деген – кыянаттыктан качуу”».