Read Кыргыз тилиндеги Библия, 2004 Аюб 29 Bible Online

Аюб 29 - Кыргыз тилиндеги Библия, 2004 bible

Аюб 29

¹Аюб маанилүү сөздөрүн улантып, мындай деди:

²«Оо, мен мурунку айлардагыдай болсом кана! Кудай мени сактап жүргөн күндөрдөгүдөй болсом кана!

³Анын чырактаны менин үстүмдө күйүп турчу, караңгыда мен Анын жарыгы менен жүрчүмүн.

⁴Жаш чагымда, Кудайдын ырайымы менин чатырыма тийип турганда, мен кандай элем!

⁵Кудуреттүү Кудай мени менен эле, балдарым тегерегимде болчу!

⁶Жолдорума сүт төгүлүп турчу, аскалар мен үчүн зайтун майын чыгарып турчу.

⁷Шаар дарбазасынын алдына чыкканымда, аянтка отургучумду койгонумда,

⁸жигиттер мени көрүп, жашынып калышчу, карылар ордунан туруп, туруп турушчу.

⁹Төрөлөр сөзүн токтотуп, колдору менен ооздорун жабышар эле.

¹⁰Атактуулардын үнү басылып, тилдери таңдайына жабышып калар эле.

¹¹Мени уккан кулак мени урматтап турар эле, мени көргөн көз мени даңктап турар эле.

¹²Анткени мен жардам сураган жакырды да, карай турган кишиси жок жетимди да сактап калчумун.

¹³Мага өлүп бара жаткандын батасы тийчү, жесир аялдын жүрөгүнө кубаныч берчүмүн.

¹⁴Мен адилеттиктин кийимин кийип жүрчүмүн, калыстыкты чапан жана баш кийим катары кийип жүрчүмүн.

¹⁵Мен сокурга көз, аксакка бут болчумун.

¹⁶Кайырчыларга ата болчумун. Өзүм билбеген адамдын талаш-тартыш маселесин кылдаттык менен чечип турчумун.

¹⁷Мыйзамсыздын жаагын талкалап турчумун, уурдагандарын тиштеринен сууруп алып турчумун.

¹⁸Мен мындай деп айтчумун: “Өз уямда өлөм, жашоо күндөрүм кумдай көп болот.

¹⁹Тамырым сууга жетет, бутактарыма шүүдүрүм түнөйт.

²⁰Атак-даңкым карыбайт, колумдагы жаа бек турат”.

²¹Мага кулак салып турушчу, күтүп турушчу, акыл айтканымда унчугушчу эмес.

²²Мен сүйлөгөндөн кийин, алар сүйлөшчү эмес, менин сөздөрүм алардын кулактарына куюлчу.

²³Мени жамгырды күткөндөй күтүшчү, ооздорун кеч жааган жамгырга ачкансып ачып турушчу.

²⁴Аларга жылмайып койсом, көргөн көздөрүнө ишенишчү эмес. Алар менин жүзүмдөгү жарыкты өчүрүшчү эмес.

²⁵Мен аларга жол көрсөтүп турчумун, алардын башында отурчумун, жоокерлердин арасындагы падышадай жашачумун, ыйлагандардын көңүлүн жубаткан сооротуучудай болчумун.