Read Кыргыз тилиндеги Библия, 2004 Аюб 3 Bible Online

Аюб 3 - Кыргыз тилиндеги Библия, 2004 bible

Аюб 3

¹Ошондон кийин Аюб сөз баштап, өзү туулган күндү каргады.

²Аюб сөзүн мындай деп баштады:

³«Мен туулган күн курусун, “Эркек бала түйүлдү”, – деген түн курусун!

⁴Ал күн караңгылык болсун. Жогорудагы Кудай ал күндү издебесин, ал күнгө жарык тийбесин!

⁵Ал күндү караңгылык менен өлүм сөлөкөтү караңгылатсын, ал күндү кара булут каптасын, куйкалаган аптаптан корккондой, ал күндөн коркуп турушсун!

⁶Ал түндү караңгылык басып калсын, ал түн жыл эсебине кирбесин, айлардын санына кирбесин!

⁷Оо, ошол түн! Ошол түн тукумсуз калсын, ошол түнү шаттык үнү угулбасын!

⁸Ал түндү күндү каргаган лебийатанды ойготууга жөндөмдүүлөр каргашсын!

⁹Анын таң атардагы жылдыздары өчсүн, ал түн жарыкты күтсүн, бирок ал келбесин, ал түн таңдын нурун көрбөсүн!

¹⁰Анткени ал түн энемдин жатынын бууган жок, кайгыны көздөрүмдөн жашырган жок!

¹¹Энемдин жатынынан чыгып баратканда эле, эмне үчүн өлүп калбадым экен, энемдин ичинен чыкканда, эмне үчүн өлүп калбадым экен?

¹²Эмне үчүн мен төрөлгөндө, мени энемдин тизелерине жаткырышты экен? Эмне үчүн эмчек эмдим экен?

¹³Азыр мен эс алып, уктап жатмакмын, жаныма тынч болмок,

¹⁴өздөрүнө күмбөз курган жер жүзүндөгү падышалар жана кеңешчилер менен,

¹⁵же алтынга бай, үйлөрүн күмүшкө толтурган төрөлөр менен жатмакмын.

¹⁶Же бойдон түшүп, жерге жашырылып калсам эмне, же жарык дүйнөнү көрбөй калган наристедей болуп өлүп калсам эмне!

¹⁷Ал жакта мыйзамсыздар үрөй учурбай калышат, ал жакта күчтөн тайып алсырагандар эс алышат.

¹⁸Ал жакта туткундар да тынчтыкка магдырашат, көзөмөлчүлөрдүн кыйкырыгын угушпайт.

¹⁹Ал жакта кичине да, чоң да бирдей, кул өз кожоюнунан кутулган.

²⁰Жабыр тартканга жарык эмнеге берилди экен, жаны кыйналганга жашоо эмнеге берилди экен?

²¹Өлүмдү күткөндөргө өлүм келбейт, алар кенчке караганда өлүмдү жан-дили менен казып алышпайт беле?

²²Алар көрдөн жай тапканына сүйүнүп, кубанычтары коюндарына батмак эмес.

²³Жолу жабык адамга жарык эмнеге берилди? Кудай караңгылык менен курчаган адамга жарык эмнеге берилди?

²⁴Yшкүрүгүм нан жегизбей жатат, онтоолорум суудай агып жатат.

²⁵Анткени мен эмнеден үрөйүм учуп качып жүрсөм, ошол мени кууп жетти. Мен эмнеден корксом, ошол келди.

²⁶Мага тынчтык да жок, эс алуу да жок, кубаныч да жок, башыма мүшкүл түштү».