Read Кыргыз тилиндеги Библия, 2004 Аюб 30 Bible Online

Аюб 30 - Кыргыз тилиндеги Библия, 2004 bible

Аюб 30

¹Азыр болсо мени өзүмдөн кичүүлөр шылдың кылып жатышат, мен алардын аталарын койлорумду кайтарган иттеримдин жанына да жаткырганга макул болбойт элем.

²Алардын күчтүү колунун мага эмне кереги бар? Алардын убагы өтүп кеткен.

³Жакырчылык менен ачарчылыктан алсырагандар түнөргөн, ээн калган, суусуз талаада каңгып жүрүшөт.

⁴Тикенектин түбүнөн майда чөп терип жешет, тикенектүү бадалдын мөмөсү – алардын тамагы.

⁵Аларды эл ичинен кубалап, ууруга кыйкыргандай кыйкырышат.

⁶Ошондуктан аларга сай-сайдын жарларында, капчыгай боорлорунда, аска-зоолордун коңулдарында жашоого туура келет.

⁷Алар тикенектин арасында ыйлашат, бадалдын түбүнө корголошот.

⁸Алар – четке кагылган адамдар, атсыз-нарксыз адамдар, жер жүзүнүн таштандылары!

⁹Азыр мен ошолордун ырдар ыры болдум, оозунан түшпөгөн сөзү болдум.

¹⁰Алар мени жек көрүшөт, менден качышат, менин бетиме түкүрүүдөн тартынышпайт.

¹¹Теңир менин жаамдын жибин үзүп, мени талкалады, ошон үчүн алар менин көз алдымда өздөрүнүн ооздорундагы ооздукту алып салышты.

¹²Бул жер жайнаган эл менин оң капталыман чыгып, мени буттан чалып жатат, өздөрүнүн кыйратуучу жолдорун мени көздөй буруп жатышат.

¹³Менин жолумду болсо бузушту, жардамчысыз эле менин өлүмүм үчүн бардыгын камдоого үлгүрүштү.

¹⁴Алар мага чоң тешиктен түшкөнсүп түшүп келишти, чуру-чуу менен мага кол салышты.

¹⁵Өтө жаман коркунучтар мага бет алды. Менин кадыр-баркым шамалдай учуп кетти, бак-таалайым булуттай тарап кетти.

¹⁶Азыр болсо ичимдеги жаным кыйналып жатат: мени кайгылуу күндөр курчады.

¹⁷Түнкүсүн сай-сөөгүм сыздайт, тарамыштарымдын тынчы кетти.

¹⁸Yстүмдөгү кийимим өтө кыйынчылык менен чечилет, көйнөгүмдүн жакасы кысып турат.

¹⁹Ал мени ылайга таштады, мен күл менен топуракка окшоп калдым.

²⁰“Мен Сенден жардам сурап жатам, бирок Сен мага жооп бербейсиң, Сенин алдыңда турам, бирок Сен мага көңүл бурбайсың.

²¹Сен мага ырайымсыз болуп калдың, кубаттуу колуң менен мага каршы чыгып жатасың.

²²Сен мени көтөрүп, катуу шамал менен кошо учуруп жатасың, бороон менен көтөрүп чаап жатасың.

²³Ошондуктан мен билем, Сен мени өлүмгө дуушар кылып, бардык жашоочулар чогула турган жайга алып барасың”.

²⁴Урандылардын астында калган адам жардам сурап колун сунбай коймок беле? Башына кырсык түшкөн адам кыйкырбай коймок беле?

²⁵Мен башына мүшкүл түшкөндөрдү көргөндө, ыйлаган жок белем? Жардыларды көргөндө, жаным кыйналган жок беле?

²⁶Мен жакшылыкты эңсеп турганда, жамандык келди, жарыкты күтүп турганда, караңгылык келди.

²⁷Менин ичим кайнап жатат, басылбайт, мен кайгылуу күнгө туш келдим.

²⁸Мен капкара болуп басып жүрөм, бирок бул күндөн эмес. Эл арасында туруп, жардам сурап кыйкырып жатам.

²⁹Мен чөөлөрдүн бир тууганы болуп калдым, төө куштардын досу болуп калдым.

³⁰Менин терим карарып кетти, сөөктөрүм ысыктан куйкаланды.

³¹Лирамдын үнү кайгылуу чыгып калды, сыбызгымдын үнү ыйга окшоп калды.