Read Кыргыз тилиндеги Библия, 2004 Аюб 31 Bible Online

Аюб 31 - Кыргыз тилиндеги Библия, 2004 bible

Аюб 31

¹Кызды карабайм деп, көзүм менен келишим түзгөм.

²Мага жогорудан, Кудайдан кандай үлүш тиймек эле? Асмандан, кудуреттүү Кудайдан кандай мурас берилмек эле?

³Өлүм мыйзамсыздар үчүн эмеспи, кырсык кыянаттык кылгандардын башына түшпөйбү?

⁴Кудай менин жолдорумду көргөн жок беле? Менин баскан кадамымды эсептеген жок беле?

⁵Эгерде мен жалган жолдо жүргөн болсом, эгерде менин буттарым амалкөйлүккө шашкан болсо,

⁶анда мени чындыктын таразасына тартышсын, ошондо Кудай менин айыпсыздыгымды билет.

⁷Эгерде менин бутум жолдон бурулган болсо, жүрөгүм көзүмдү ээрчип жүргөн болсо, эгерде таза эмес бир нерсе колума жабышып калган болсо,

⁸анда мен сепкенди башка бирөө жесин жана мен өндүргөн нерсе тамырынан жулунсун.

⁹Эгерде менин жүрөгүм аялга азгырылса, жакынымдын эшигинин алдына тузак койгон болсом,

¹⁰анда менин аялым башка бирөөнүн жаргылчагын тартсын, аны башка бирөөлөр маскара кылышсын.

¹¹Анткени бул – ойноштук, бул – сотко тартыла турган күнөө.

¹²Бул – менин бүт мал-мүлкүмдү түп-тамыры менен жок кылып сала турган жалмап салуучу от.

¹³Кулум менен күңүм мага каршы чыкканда, алардын укуктарын тоотпой койгон болсом,

¹⁴анда Кудай мага каршы чыгар эле, ошондо мен эмне кылар элем? Ал менин ишимди тергей баштаса, мен Ага эмне деп жооп бере алар элем?

¹⁵Мени да, аны да эненин курсагында жараткан Өзү эмеспи, бизди эненин курсагында жасаган Өзү эмеспи?

¹⁶Жакырлардын сураганын бербей койдум беле? Жесирдин көзүн жалдыраттым беле?

¹⁷Бир үзүм нанды жалгыз жедим беле? Андан жетим да жеген жок беле?

¹⁸Анткени ал бала күнүнөн бери меникинде атасыныкында жашагандай жашады, энемдин курсагынан чыккандан бери мен жесирге көз салып келдим.

¹⁹Мен кийими жок өлүп бара жатканды, жамынчысы жок жардыны көргөндө,

²⁰ал мага чын жүрөктөн батасын бербей койду беле? Ал менин койлорумдун жүнүнө жылынган жок беле?

²¹Дарбаза алдында мага жардам беришсе да, жетимге кол көтөрсөм,

²²анда менин ийиним далымдан бөлүнүп түшүп калсын, колум чыканагымдан сынып түшсүн.

²³Анткени Кудайдын жазасы мен үчүн өтө коркунучтуу. Анын улуулугунун алдында мен туруштук бере алмак эмесмин.

²⁴Мен алтынга таяндым беле? Байлыкка: “Менин үмүтүм сенсиң!” – деп айттым беле?

²⁵Байлыгымдын ашып-ташыганына, колумдун көп тапканына кубандым беле?

²⁶Күндүн жаркырап тийип турганын карап туруп, айдын сөөлөттүү калкып баратканын карап туруп,

²⁷жүрөгүм жашыруун азгырылды беле, оозум колдорумду өптү беле?

²⁸Анда бул да сотко тартыла турган кылмыш болмок, анткени мен кудуреттүү Кудайдан баш тарткан болор элем.

²⁹Мен душманымдын кыйраганына кубандым беле? Анын башына түн түшкөндө, салтанат курдум беле?

³⁰Оозумдун аны каргап күнөөгө батуусуна жол берген эмесмин.

³¹Менин чатырымдагы кишилер: “Оо, анын этинен жегендерден эч ким тойбой калган эмес!” – дешкен жок беле?

³²Бөтөн жерден келген киши көчөдө түнөгөн эмес. Жолоочуга эшигимди ачып берчүмүн.

³³Эгерде мен адам катары күнөөлөрүмдү жашырып койгон болсом, мыйзамсыз иштеримди көкүрөгүмө катып койгон болсом,

³⁴анда мен чоң жамааттан коркор элем, урук-туугандарымдын жек көрүүсү үрөйүмдү учурар эле, мен ооз ачпас элем, босогодон сыртка чыкпас элем.

³⁵Оо, мени кимдир бирөө укса кана! Менин каалоом мындай: кудуреттүү Кудай мага жооп берсе экен, менин коргоочум буларды китепке жазып койсо экен.

³⁶Мен аны ийиниме көтөрүп жүрөр элем, башыма гүл таажыдай кийип алар элем.

³⁷Баскан кадамымдын санын ага кабарлар элем, ага төрөгө жакындагандай жакындар элем.

³⁸Эгерде жерим менин үстүмөн арызданып ыйлаган болсо, анын бороздору менин үстүмөн даттанган болсо,

³⁹эгерде мен анын түшүмүн акысыз жеген болсом, дыйкандардын жашоосун кыйынчылыкка салган болсом,

⁴⁰анда буудай ордуна төө тикенек, арпа ордуна карамык өссүн». Ошентип, Аюбдун сөзү бүттү.