Read Кыргыз тилиндеги Библия, 2004 Аюб 32 Bible Online

Аюб 32 - Кыргыз тилиндеги Библия, 2004 bible

Аюб 32

¹Аюб өзүнүкүн туура деп эсептегендиктен, тигил үч киши Аюбга жооп бергенин токтотушту.

²Ошондо Рам уруусунан чыккан буздук Барахел уулу Элийунун каары кайнады. Өзүн Кудайга караганда адилеттүү эсептегени үчүн, ал Аюбга аябай ачууланды.

³Эмне деп жооп берүүнү билбей туруп, Аюбду айыптай берген үч досуна да ачууланды.

⁴Алар өзүнөн улуу болгондуктан, Элийу Аюбга каршы сүйлөй элек эле.

⁵Элийу тигил үч кишинин оозунда жооп жок экенин көргөндө, абдан ачууланды.

⁶Буздук Барахел уулу Элийу мындай деп жооп берди: «Мен силерден жашмын, силер карысыңар, ошондуктан ыйбаа кылып, оюмду айткандан корктум.

⁷Мен өзүмчө: “Карылык сүйлөсүн, көп жашагандар акылмандыкка үйрөтсүн”, – дедим.

⁸Бирок адамга акылды адамдын ичиндеги рух менен кудуреттүү Кудайдын деми берет.

⁹Көп жашагандар эле акылман боло бербейт, чындыкты карылар эле түшүнө бербейт.

¹⁰Ошондуктан мен мындай дейм: “Мени уккула, мен да өз пикиримди айтайын”.

¹¹Мен силер сүйлөп бүткөнчө күтүп турдум, силердин пикириңерди көңүл коюп угуп турдум, силер айтар сөзүңөрдү ойлоп тапкыча күтүп турдум.

¹²Мен силерди кадала карап турдум, бирок Аюбду эч кимиңер ашкерелеген жоксуңар, анын сөздөрүнө эч кимиңер жооп берген жоксуңар.

¹³Ошондуктан силер: “Биз акылмандыкка жеттик, аны адам эмес, Кудай ашкерелейт”, – деп айтпагыла.

¹⁴Эгерде Аюб мага карата сүйлөсө, анда мен силерге окшоп жооп бермек эмесмин.

¹⁵Коркуп кетишти, жооп бере албай калышты, сүйлөбөй калышты.

¹⁶Мен күтө бердим, алар болсо сүйлөбөй коюшту, токтоп калышты, жооп бере албай калышты.

¹⁷Ошондуктан өзүм тараптан мен да жооп берейин, мен да өз оюмду айтайын.

¹⁸Анткени айтар сөзүм толтура, рухум ичиме батпай бара жатат.

¹⁹Ичим оозу ачыла элек шараптай, жарылганы турган жаңы чаначтай болуп турат.

²⁰Сүйлөсөм, жеңилдеп калам, оозумду ачып жооп берейин.

²¹Эч кимге бет карамалык кылбайм, эч бир адамга жагынып, кошомат кылбайм.

²²Анткени мен кошоматчылык кылганды билбейм, эгерде ошондой болсо, Жаратканым, мени азыр өлтүр!