Read Кыргыз тилиндеги Библия, 2004 Аюб 33 Bible Online

Аюб 33 - Кыргыз тилиндеги Библия, 2004 bible

Аюб 33

¹Ошондуктан, Аюб, менин сөздөрүмө кулак сал, менин бардык сөздөрүмдү ук.

²Мына, мен оозумду ачып жатам, менин тилим көмөкөйүмдө сүйлөп жатат.

³Менин сөздөрүм таза жүрөктөн чыгат, оозум таза билимди сүйлөйт.

⁴Мени Кудайдын Руху жараткан, мага кудуреттүү Кудайдын деми жан берген.

⁵Эгерде жооп бере алсаң, жооп бер, даярдан, менин алдымда сүйлө.

⁶Кудайдын алдында мен да сендеймин, мен да сага окшоп топурактан жаратылгам.

⁷Ошондуктан менден коркуп тынчың кетпесин, менин колум сен үчүн оор болбосун.

⁸Сен менин кулагыма сүйлөдүң, мен сенин сүйлөгөн үнүңдү уктум.

⁹Сен: “Мен тазамын, кемчилигим жок, күнөөлүү эмесмин, менде жалганчылык жок.

¹⁰Бирок Кудай менден айып тапты, мени Өзүнүн душманы деп эсептейт.

¹¹Менин буттарымды көзөнөк жыгачка салып, менин бардык жолдорумду карап турат”, – дедиң.

¹²Сенин ушинтип айтканың туура эмес, мен сага муну далилдеп берем, анткени Кудай адамдан жогору.

¹³Эмне үчүн сен Аны менен айтышып жатасың? Ал Өзүнүн иштеринин биринин да эсеп-кысабын бербейт.

¹⁴Кудай бир жолу айтат, эгерде аны байкабай калышса, экинчи жолу:

¹⁵түшүндө, түнкү көрүнүштө, адамдардын баары уктап жатканда, төшөгүндө үргүлөп жатканда айтат.

¹⁶Ошол учурда Ал адамдын кулагын ачып, Өзүнүн насаатын куят.

¹⁷Адамды кандайдыр бир жаман иштен буруп кетиш үчүн жана анын текеберлигин жок кылыш үчүн,

¹⁸анын жанын туңгуюктан сакташ үчүн жана анын өмүрүн кылычтан өлүүдөн сакташ үчүн ошентет.

¹⁹Же болбосо ал оору аркылуу, сай-сөөгүн сыздаткан оору аркылуу төшөктө жатып эсине келет.

²⁰Анын нанга көңүлү чаппай калат, жаны жактырган тамакты жээрип калат.

²¹Эти качат, көрүнбөгөн сөөктөрү көрүнүп, оркоюп чыгат.

²²Анын жаны көргө, өмүрү өлүмгө жакындайт.

²³Эгерде анын адамга түз жол көрсөтүүчү, миңдеген периштелердин бири болгон насаатчы периштеси бар болсо,

²⁴Кудай ага боор ооруп: “Аны көрдөн куткар, Мен анын жаны үчүн төлөнүүчү кун таптым”, – дейт.

²⁵Ошондо анын денеси жаш кезиндегиден да жаш болуп калат. Ал өзүнүн жаш чагына кайрылып келет.

²⁶Кудайга сыйына турган болсо, Ал ага ырайым кылат. Ал анын жүзүнө кубаныч менен карайт. Адамга адилдигин кайра берет.

²⁷Ошондо ал адамдарга карап, мындай деп айтат: “Мен күнөөгө батып, чындыкты бурмалагам, бирок жазаланган эмесмин.

²⁸Ал менин жанымды көрдөн куткарды, ошондуктан менин өмүрүм жарыкты көрүп жатат”.

²⁹Кудай адамга ушунун баарын эки-үч жолу кылат.

³⁰Анын жанын көрдөн алып калыш үчүн жана тирүүлөрдүн жарыгы менен жарык кылыш үчүн, ушундай кылат.

³¹Көңүл бур, Аюб. Ук мени, үндөбө, мен сүйлөйүн!

³²Эгер айтар жообуң болсо айт, сүйлө, анткени мен сенин актанышыңды каалар элем.

³³Эгер жок десең, анда мени ук, унчукпа, мен сени акылмандыкка үйрөтөм».