Read Кыргыз тилиндеги Библия, 2004 Аюб 36 Bible Online

Аюб 36 - Кыргыз тилиндеги Библия, 2004 bible

Аюб 36

¹Элийу сөзүн мындай деп улантты:

²«Бир аз чыдай тур, Кудайдын атынан дагы айта турган сөзүм бар экенин мен сага көрсөтөйүн.

³Мен пикиримди алыстан баштайм, Жаратканымдын адилеттүүлүгүн далилдеп берем.

⁴Анткени, чынында эле, менин сөздөрүм жалган эмес. Сенин алдыңда билими жеткилең бирөө турат.

⁵Мына, Кудай кудуреттүү, Ал жүрөгү таза адамды четке какпайт!

⁶Ал мыйзамсыздарды колдобойт, эзилгендерге тиешелүүсүн берет.

⁷Ал адилдерден көзүн албайт, аларды падышалардын тагына отургузат, аларды жогорулатат.

⁸Эгерде алар чынжыр менен кишенделип, кырсыктын кишендеринде кармалып турушса,

⁹анда Ал алардын иштерин өздөрүнө көрсөтөт, алардын мыйзамсыздыгы көбөйүп кеткенин өздөрүнө көрсөтөт.

¹⁰Эскертиш үчүн, алардын кулактарын ачат, аларга: “Мыйзамсыз иштерден баш тарткыла”, – дейт.

¹¹Эгерде тил алып, Ага кызмат кылышса, анда өз күндөрүн жыргалчылыкта, өз жылдарын шаттыкта өткөрүшөт.

¹²Эгерде тил алышпаса, анда жаа жебесинен өлүшөт, акылдан ажырап өлүшөт.

¹³Бирок эки жүздүүлөр жүрөгүнө каар топтойт, Кудай аларды кишендеп салганда, Ага кайрылышпайт.

¹⁴Ошондуктан алардын жаны жаш чагында өлөт, өмүрлөрү бузулгандар менен өтөт.

¹⁵Ал жакырды башына түшкөн кырсыктан куткарат, эзилип жатканда, анын кулагын ачат.

¹⁶Ал сени да тар жерден кысымчылык жок, кең жерге алып чыгат эле, дасторконуң майга толот эле.

¹⁷Бирок сен мыйзамсыздардын түшүнүктөрүнө жык толгонсуң: түшүнүк менен айыптоо сага жакын.

¹⁸Кудайдын каары сени жазалап, өлтүрүп койбосун! Сени чоң кун куткарбайт.

¹⁹Ал сенин байлыгыңды бааламак беле? Жок! Алтыныңды да, байлыгыңды да баалабайт.

²⁰Элдер өздөрүнүн турган жеринде кырылып жаткан ошол түндү тилебе.

²¹Сактан, мыйзамсыздыкка барба, анткени сен азап тартканды мыйзамсыздык кылгандан артык көрдүң.

²²Кудай Өзүнүн кудурети менен бийик, Андай насаатчы барбы?

²³Ким Ага Анын жолун көрсөтөт? “Сен адилетсиз иш кылып жатасың”, – деп, Ага ким айта алат?

²⁴Адамдар көрүп турган Анын иштерин даңазалоону унутпа.

²⁵Анын иштерин ар бир адам көрө алат, адам аларды алыстан байкай алат.

²⁶Мына, Кудай улуу, ошондуктан биз Аны таанып биле албайбыз; Анын жылдарынын саны изилденгис.

²⁷Ал суу тамчыларын чогултат, алар көп болгондо, жамгыр болуп төгүлөт.

²⁸Жамгыр булуттардан тамчылайт, адамдарга мол төгүлөт.

²⁹Ошондой эле булуттардын жайылышын, Анын чатырынын күркүрөгөнүн ким түшүнө алат?

³⁰Азыр алардын үстүнө Ал Өз жарыгын чачыратып, деңиз түбүн жаап жатат.

³¹Ал жактан Ал элдерди башкарып, тамак-ашты мол берип жатат.

³²Ал чагылганды Өз колдоруна жашырып, ага кимди урууну буйруйт.

³³Анын күркүрөөсү Өзү жөнүндө билдирет, жаныбарлар да эмне болуп жатканын сезишет.