Read Кыргыз тилиндеги Библия, 2004 Аюб 37 Bible Online

Аюб 37 - Кыргыз тилиндеги Библия, 2004 bible

Аюб 37

¹Бул жөнүндө ойлогондо, жүрөгүм титиреп, ордунан козголуп кетти.

²Уккула, Анын үнүн уккула, Анын оозунан чыккан күркүрөөнү уккула!

³Анын жаңырыгы бүт асманга жаңырат, анын жарыгы бүт жер үстүнө жаркырайт.

⁴Анын артынан үн күркүрөйт. Кудай Өзүнүн улуулугунун үнү менен күркүрөйт. Анын үнүн эч ким токтотпойт.

⁵Кудай Өз үнү менен укмуштуудай күркүрөп жатат, биздин акылыбыз жетпеген улуу иштерди жасап жатат.

⁶Анткени Ал карга: “Жерге түш!” – деп айтат. Жамгыр да, нөшөр да Анын бийлиги астында.

⁷Анын ишин бардык адамдар билиш үчүн, Ал ар бир адамдын колуна мөөр басат.

⁸Ошондо айбандар ийиндерине кирип, чээндеринен чыкпай калышат.

⁹Түштүктөн бороон, түндүктөн ызгаар келет.

¹⁰Кудайдын деминен муз жаралат, суунун үстү тартылат.

¹¹Ошондой эле Ал булуттарды сууга толтурат, булуттар Анын жарыгын таратышат.

¹²Булуттар Анын каалоосу боюнча багыт алып, жер бетинде Анын буйруктарын аткарышат.

¹³Ал аларды, же жазалаш үчүн, же жакшылык үчүн, же ырайым кылыш үчүн жиберет.

¹⁴Буга көңүл бур, Аюб. Токтой тур, Кудайдын укмуш иштерин түшүн.

¹⁵Кудай аларды кандай жайгаштырганын, Өзүнүн булуттарынын арасынан чагылганды кандай чартылдатарын билесиңби?

¹⁶Булуттардын кантип илинип турганын, билимдин Кеменгери жасаган керемет иштерди билесиңби?

¹⁷Ал түштүктүн ысык шамалы менен жерди тынчытканда, кийген кийимиң кандай ысырын билесиңби?

¹⁸Сен Аны менен кошо жез күзгүдөй жаркыраган асманды жайдың беле?

¹⁹Бизге Ага эмне деп айтууну үйрөт. Биз бул караңгылыкта эч нерсе түшүнө албай жатабыз.

²⁰Менин айтканым Ага жетет болду бекен? Айтылган сөздүн Ага жеткенин айткан бирөө бар бекен?

²¹Азыр булуттардан күндүн жарыгы көрүнбөй жатат, бирок шамал согуп, асманды тазалап кетет.

²²Жаркыроо түндүктөн келет, Кудайдын тегереги укмуштуудай жарык.

²³Кудай кудуреттүү! Ага биздин акылыбыз жетпейт. Ал күчү, өкүмү жана адилеттүүлүгү менен улуу. Ал эзбейт.

²⁴Ошондуктан адамдар Анын алдында коркуп турушсун, бардык акылмандар Анын алдында титиреп турушсун!»