Read Кыргыз тилиндеги Библия, 2004 Аюб 38 Bible Online

Аюб 38 - Кыргыз тилиндеги Библия, 2004 bible

Аюб 38

¹Теңир бороондун ичинен Аюбга мындай деп жооп берди:

²«Мааниси жок сөздөрү менен Кудайдын чечимин караңгылаткан бул ким?

³Эркектей болуп белиңди буу, Мен сенден сурайын, сен Мага түшүндүрүп бер!

⁴Мен жердин негизин жаратканда, сен кайда элең? Айт, эгер билсең.

⁵Анын көлөмүн ким чектеди? Айт, эгер билсең. Аны ким жип менен ченеп чыкты?

⁶Анын негизи эмненин үстүнө орнотулган? Же болбосо анын бурчка коюлуучу ташын ким койгон?

⁷Таңкы жылдыздардын кубанычтуу ырынын коштоосунда Кудайдын бардык уулдары кубанычтан кыйкырып турганда, сен кайда элең?

⁸Деңиз эненин курсагынан чыккансып чыкканда, аны дарбаза менен ким тосту?

⁹Мен ага булутту кийим кылып, мунарыкты жалаяк кылып бергенде, сен кайда элең?

¹⁰Мен ага чек коюп, дарбаза, кулпу салып:

¹¹“Ушуга чейин жетесиң, андан ары өтпөйсүң, текебердүү толкунуңдун чеги ушул жер болот”, – деп айтканда, сен кайда элең?

¹²Сен өз өмүрүңдө таңга буйрук бердиң беле? Таң нуруна өз ордун көрсөттүң беле?

¹³Сен ага төгөрөктүн төрт бурчун нурга бөлө дедиң беле? Жер жүзүнөн мыйзамсыздарды силкип сал дедиң беле?

¹⁴Чопо мөөрдүн астында өзгөрүлгөндөй, жер да өзгөрүлүп, түрдүү түстөгү кийимдей болуп калсын дедиң беле?

¹⁵Мыйзамсыздардын чырагы өчсүн дедиң беле? Алардын суук колдору сынсын дедиң беле?

¹⁶Сен деңиздин тереңине түштүң беле? Түпкүрдүн түбүн изилдегени түштүң беле?

¹⁷Сен үчүн өлүм дарбазасы ачылды беле? Өлүм көлөкөсүнүн дарбазасын көрдүң беле?

¹⁸Жердин кеңдигин карап чыктың беле? Эгерде ушулардын бардыгын билсең, түшүндүрүп бер.

¹⁹Жарык жашаган жерге барчу жол кайда? Караңгынын турган жери кайда?

²⁰Анын чегине жеткениң чын, анын үйүнө алып баруучу жолду билериң чын.

²¹Сен муну билесиң, анткени сен ошол кезде эле төрөлгөнсүң, сен жашаган күндөрдүн саны өтө көп.

²²Сен кар сактагыч кампага кирдиң беле? Мөндүрлөр сакталган казынаны көрдүң беле?

²³Мен аларды алаамат күндөргө, салгылаш менен кан майдан күндөрүнө сактап турам.

²⁴Жарык кайсы жол менен жайылат? Чыгыш шамалы жер үстүнөн кайсы жол менен өтөт?

²⁵Суулардын нугун ким буруп турат, чартылдаган чагылгандын жолун ким салып турат?

²⁶Эл жашабаган жерлерге, адам жашабаган эрме чөлдөргө ким жамгыр жаадырып жатат?

²⁷Чөлдөр менен талаалардын суусунун ким кандырып жатат? Ким чөптөрдүн тамырын жибитип, өскөнгө түрткү берип жатат?

²⁸Жамгырдын атасы барбы? Же шүүдүрүмдүн тамчыларын ким жаратып жатат?

²⁹Муз кимдин курсагынан чыгат, асман бубагын ким жаратып жатат?

³⁰Суулар таштай болуп катат, түпсүздүктүн үстү тоңот.

³¹Сен Ким топ жылдызынын түйүнүн байлай аласыңбы, Кесил топ жылдызынын түйүнүн чече аласыңбы?

³²Топ жылдызды өз маалында чыгара аласыңбы? Ашты балдары менен алып жүрө аласыңбы?

³³Асмандын мыйзамдарын билесиңби, жер жүзүнө анын бийлигин орното аласыңбы?

³⁴Суу мол болуп, сени капташ үчүн, булуттарга үнүңдү көтөрө аласыңбы?

³⁵Чагылгандарды жибере аласыңбы? Алар сага келип: “Биз мына”, – деп айтышмак беле?

³⁶Жүрөккө акылмандыкты ким салды, же болбосо акылга маанини ким берди?

³⁷Ким өз акылы менен булуттарды санап чыга алат? Ким асман идиштериндеги сууларды токтото алат?

³⁸Топурак чылага айланып, чоң кесектер бири-бирине жабышып жатканда, аларды ким токтото алат?

³⁹Ургаачы арстандын тамагын сен таап берип жатасыңбы? Арстандын балдарын сен тойгузуп жатасыңбы?

⁴⁰Алар чээнде жатканда же көлөкөлүү буктурмада жем аңдып отурганда, тамагын сен камдап берип жатасыңбы?

⁴¹Балапандары тамак таппай каңгып, Кудайга кайрылып чыйпылдап жатканда, каргалардын жемин ким даярдап берип жатат?