Read Кыргыз тилиндеги Библия, 2004 Аюб 39 Bible Online

Аюб 39 - Кыргыз тилиндеги Библия, 2004 bible

Аюб 39

¹Сен аскалардагы жапайы эчкилердин тууй турган маалын билесиңби? Маралдардын тууп жатканын көрдүң беле?

²Алардын боозуган ай-күнүн эсептей аласыңбы? Алардын тууй турган маалын билесиңби?

³Алар балдарын тууп, өз жүктөрүн ыргытып жатышканда ийилишет.

⁴Алардын балдары күчкө кирип, талаада чоңоюп, бөлүнүп кетишет, аларга кайрылып келишпейт.

⁵Жапайы эшекти эркин коё берген ким? Жапайы качырды кишенден чыгарган ким?

⁶Аларга талааны үй кылып, шор жерди турак кылып берген Менмин.

⁷Ал көп эл жашаган шаарга күлөт, айдагандардын кыйкырыгын укпайт.

⁸Тоолордон жем издейт, ар кандай өсүмдүктөрдү издеп табат.

⁹Жапайы өгүз сага кызмат кылгысы келеби? Ал сенин малканаңа түнөйбү?

¹⁰Жапайы өгүздү аркан менен байлап алып, жер айдай аласыңбы? Аны менен талааны малалай аласыңбы?

¹¹Күчтүү деп, ага ишене аласыңбы? Ага өзүңдүн ишиңди таштап коё аласыңбы?

¹²Ал сенин үрөнүңдү кайрып, кырманыңа жыйып берерине ишене аласыңбы?

¹³Тоос кушка кооз канатты, төө кушка канат менен мамык жүндү сен бердиң беле?

¹⁴Ал жумурткасын жерге таштайт, аларды кумга жылытат.

¹⁵Аларды бирөөнүн буту басып кетерин же жырткыч айбандар тебелеп кетерин унутуп калат.

¹⁶Ал өгөй балдарына мамиле кылгансып, өз балдарына катаал мамиле кылат, мээнетим текке кетет деп коркпойт.

¹⁷Анткени Кудай ага даанышмандык берген эмес, ага акыл да бөлүп берген эмес.

¹⁸Бирок ал бийиктикке көтөрүлгөндө, атка да, атчанга да күлөт.

¹⁹Атка кубат берип, мойнуна жал жапкан сенби?

²⁰Аны чегирткени коркуткандай коркута аласыңбы? Таноосунан чыккан кошкурук – бир укмуш!

²¹Буттары менен жер казып, күчүнө сыймыктанат, куралга каршы барат.

²²Ал коркунучка күлөт, андан коркпойт, кылычтан жалтанбайт.

²³Yстүндө саадак кагылат, найза менен кыска найза жаркылдайт.

²⁴Жаалы келип турганда, топурак жутат, сурнай тартылганда, ордунда тура албайт.

²⁵Сурнай тартылганда, “куу-куу” деп кишенеп турат. Ал салгылашты, жол башчылардын катуу үндөрүн, кыйкырыкты алыстан сезет.

²⁶Туйгун сенин акылмандыгың менен учуп жүрөбү? Канаттарын сенин акылмандыгың менен түштүккө жайып жатабы?

²⁷Бүркүт сенин сөзүң менен асманга көтөрүлүп, аскага уясын салабы?

²⁸Ал зоокада жашайт, зооканын кырында, эч ким бара албас жерде түнөйт.

²⁹Ошол жактан өзүнүн жемин көрөт, анын көздөрү алыстан көрөт.

³⁰Анын балапандары кан ичет, өлүк кайсы жерде жатса, ал ошол жерде».

³¹Теңир сөзүн улантып, Аюбга мындай деди:

³²«Кудуреттүү Кудай менен талашып-тартышкан адам да үйрөтөбү? Кудайды ашкере кылган адам Ага жооп берсин».

³³Ошондо Аюб Кудайга мындай деп жооп берди:

³⁴«Мына, мен эч нерсеге арзыбаган адаммын! Мен Сага эмне деп жооп берем? Колум менен оозумду жабам.

³⁵Мен бир жолу айткан болчумун, эми жооп бербейм, эки жолу айткан болсом да, мындан ары жооп бербейм».