Read Кыргыз тилиндеги Библия, 2004 Аюб 4 Bible Online

Аюб 4 - Кыргыз тилиндеги Библия, 2004 bible

Аюб 4

¹Теймандык Элипаз мындай деп жооп берди:

²«Эгерде биз бир сөз айтсак, сага катуу тийбес бекен? Бирок сөзгө ким тыюу сала алат?

³Сен көптөргө акыл-насаат айтчусуң, алсыз колдорго күч берчүсүң,

⁴сенин сөздөрүң жыгылганды тургузган, алсырап тизе бүккөнгө күч берген.

⁵Эми өзүңдүн башыңа мүшкүл түшкөндө, алсырап калдың. Сага тийди эле, көңүлүң чөктү.

⁶Кудайдан корккондугуң сенин үмүтүң, такыбаа жашаганың сенин тирегиң болуш керек эле да.

⁷Эстеп көрчү, айыпсыз адам өлдү беле? Адил адамдар тукум курут болду беле?

⁸Мен көргөндөн, кыянаттык эккендер менен жамандык сепкендер ошону эле оруп алып жатышат.

⁹Кудайдын деминен өлүшөт, Кудайдын каардуу рухунан жок болуп кетишет.

¹⁰Арстандын айкырыгы менен жаш арстандын үнү басылат, жаш арстандын азуусу сынат.

¹¹Зор арстан жем таба албай өлөт, ургаачы арстандын күчүктөрү тентип кетишет.

¹²Мына, мага бир сөз жашыруун жетти, мен ал сөздөн шыбыш уктум.

¹³Түнкү көрүнүштөр жөнүндө ойлоп жатканда, адамдарды уйку басканда,

¹⁴мени коркунуч каптап, калтырак басып, сай-сөөгүм сыздады.

¹⁵Yстүмөн бир рух учуп өттү, төбө чачым тик турду.

¹⁶Ал турду, бирок мен анын өңүн тааный алган жокмун, көз алдымда бир кебете гана турду. Акырын соккон жел жүрдү, мен үн уктум:

¹⁷“Адам Кудайдан да адилеттүү бекен? Адам өз Жаратканынан да таза бекен?”

¹⁸Ал Өз кулдарына да ишене албайт, Өз периштелеринен да кемчиликтерди көрөт.

¹⁹Андан бетер топурактан жасалган ийбадатканада жашагандардан да кемчилик көрөт. Алардын негизи топуракта, алар күбөдөн да тез жок болушат.

²⁰Алар таң атып кеч киргенге чейин эле чачырап жок болушат. Кантип жок болгонун көрбөй да каласың.

²¹Өздөрү менен кошо алардын кадыр-баркы да жок болуп жаткан жокпу? Алар акылмандыкка жетпей өлүп жатышат.