Read Кыргыз тилиндеги Библия, 2004 Аюб 40 Bible Online

Аюб 40 - Кыргыз тилиндеги Библия, 2004 bible

Аюб 40

¹Теңир Аюбга бороон ичинен мындай деп жооп берди:

²«Эркектей болуп белиңди буу, Мен сенден сурайын, сен Мага түшүндүрүп бер.

³Өзүңдү акташ үчүн, Менин сотумду жокко чыгарып, Мени айыптагың келеби?

⁴Сенин күчүң Кудайдыкындайбы? Ал күркүрөгөндөй күркүрөй аласыңбы?

⁵Андай болсо өзүңдү улуулук менен, даңаза менен шөкөттөп көрчү, жаркыраган шаан-шөкөт менен, келишкен кооздук менен курчанып көрчү.

⁶Каарыңдын жаалын чачып көрчү, текебер болгон бардык нерсени карап, аны моюн сундуруп көрчү.

⁷Менменсингендердин баарын карап, аларды кемсинтип көрчү, мыйзамсыздарды турган жеринде кыйратып көрчү.

⁸Алардын баарын жерге көмүп көрчү, алардын жүзүн караңгылык менен каптап көрчү.

⁹Мен ошондо сени өзүңдүн оң колуң куткара алат деп билем.

¹⁰Мына бегемот, Мен аны сени жараткандай эле жараткам. Ал өгүздөй болуп чөп жейт.

¹¹Анын күчү белинде, анын кубаттуулугу белинин булчуңунда.

¹²Куйругун кедр жыгачындай бурат, белиндеги тарамыштары тутумдашып турат.

¹³Анын буттары жез кернейдей, сөөктөрү темир таяктардай.

¹⁴Бул – Кудайдын жолдорунун жеткен чеги. Аны Жараткан гана ага Өз кылычын жакындата алат.

¹⁵Анын тамагын тоолор камдайт, ал жерде бардык жапайы айбандар оюн салып жүрүшөт.

¹⁶Ал саябандуу дарактардын түбүндө, калың камыштардын арасында, саздарда жатат.

¹⁷Аны саябандуу дарактар көлөкөсү менен жаап, өзөн боюндагы талдар курчап турат.

¹⁸Мына, ал дарыядан суу ичип жатат, шашпайт, Иордан суусу оозуна кирип жатса да, козголуп койбойт.

¹⁹Аны өзүнүн көзүнчө ким кармай алат? Ким анын тумшугун темир илгек менен теше алат?

²⁰Сен лебийатанды кайырмак менен тартып чыгара аласыңбы? Жип менен тилинен байлай аласыңбы?

²¹Анын таноосун тешип чүлүктөй аласыңбы? Жаагын ийне менен теше аласыңбы?

²²Ал сага көпкө жалынып турмак беле? Сага жылуу сөздөрдү сүйлөмөк беле?

²³Ал сени менен келишим түзмөк беле? Аны өзүңө биротоло кул кыла аласыңбы?

²⁴Аны менен чымчык менен эрмектешкендей эрмектеше аласыңбы, аны кыздарың үчүн байлап бере аласыңбы?

²⁵Аны балыкчылар сатышат болду бекен? Аны Канаан соодагерлеринин арасында бөлүшөт болду бекен?

²⁶Анын терисин найза менен теше аласыңбы, башын балыкка ыргыткан дегээ менен сая аласыңбы?

²⁷Ага кол салып көрчү! Күрөш жөнүндө унутпа, мындан кийин мындай кылбайсың.