Read Кыргыз тилиндеги Библия, 2004 Аюб 41 Bible Online

Аюб 41 - Кыргыз тилиндеги Библия, 2004 bible

Аюб 41

¹Сенин үмүтүң бекер, анын бир эле көз карашынан кулап калбайт бекенсиң?

²Анын тынчын алганга батынгыдай баатыр жок, анан Менин алдымда ким туруштук берип тура алат?

³Мен карыз болгудай, Менден мурун бирөө бар беле? Асман астындагынын бүт бардыгы Меники.

⁴Анын дене мүчөлөрү тууралуу, анын күчү тууралуу, анын төп келишкен келбети тууралуу унчукпай коё албайм.

⁵Ким анын терисин сыйрый алат, ким анын кош жаагына жакындап бара алат?

⁶Ким анын оозун ача алат? Анын тегерете тизилген тиштери үрөйдү учурат.

⁷Анын сыймыгы – катуу кабырчыгы. Алар бири-бирине бекем жабыштырылган.

⁸Алар бири-бирине тийип турат, арасынан аба да өтпөйт.

⁹Бири-бирине тыгыз жатат, бири-бирине жармашып турат, ажырабайт.

¹⁰Анын чүчкүрүгүнөн жарык көрүнөт, анын көздөрү таңдын кирпиктериндей.

¹¹Анын оозунан жалын чыгып, от учкундары чачырайт.

¹²Кайнап жаткан казандан түтүн чыккансып, анын таноолорунан түтүн чыгат.

¹³Анын деми көмүрдү күйгүзүп кетет, анын оозунан жалын чыгат.

¹⁴Анын мойнунда күч жатат, анын алдында коркунуч качат.

¹⁵Анын денесинин эт бөлүктөрү өз ара бекем бириккен, козголбойт.

¹⁶Анын жүрөгү таштай катуу, тегирмендин астынкы ташындай катуу.

¹⁷Ал ордунан турганда, балбандарды коркунуч басып, үрөйлөрү учкандыктан, өздөрүн таптакыр жоготуп коюшат.

¹⁸Ага тийген кылыч да, найза да, дегээ да, соот да туруштук бере албайт.

¹⁹Темирди ал саман катары, жезди чириген дарак катары эсептейт.

²⁰Жаа кызы аны качыра албайт. Салмоор таштары ал үчүн топондой.

²¹Чокморду ал бир тал самандай көрөт, дегээнин ышкырып учканына анын күлкүсү келет.

²²Анын астында курч таштар жатат, ал баткактагы учтуу таштардын үстүндө жатат.

²³Ал иримди казандай боркулдатып, деңизди майдай кайнатат.

²⁴Артына жарык чачкан жол калтырат, ошондо түпсүздүк агарып калгандай көрүнөт.

²⁵Жер үстүндө ага эч нерсе тең келе албайт, ал коркпос болуп жаратылган.

²⁶Бийик тургандардын баарына тайманбай карайт, ал – бардык текебер уулдардын падышасы».