Read Кыргыз тилиндеги Библия, 2004 Аюб 6 Bible Online

Аюб 6 - Кыргыз тилиндеги Библия, 2004 bible

Аюб 6

¹Ошондо Аюб мындай деп жооп берди:

²«Оо, менин муң-зарым таразага туура тартылса кана, аны менен бирге тарткан азабым таразага салынса кана!

³Анда тарткан азабым деңиз кумунан да оор болор эле! Ошондуктан менин сөздөрүм токтолбостон куюлат.

⁴Анткени мага кудуреттүү Кудайдын жебелери сайылды. Анын уусун менин рухум ичип жатат. Кудайдын коркунучтары мага каршы топтолду.

⁵Жапайы эшек чөп үстүндө айкырмак беле? Өгүз өз тоютунун алдында мөөрөмөк беле?

⁶Даамсыз тамакты туз кошпой жешмек беле, жумуртканын агында даам болмок беле?

⁷Менин жаным тийгиси келбеген нерсе менин жийиркеничтүү тамагым болду.

⁸О, мен тилегиме качан жетем? Кудай менин эңсегенимди качан аткарат?

⁹О, Кудай ырайым кылып, мени талкалап салса кана! Өз колун сунуп, мени өлтүрүп салса кана!

¹⁰Мен анда кубанмакмын, ырайымсыз дартыма чыдамдуулук көрсөтмөкмүн, анткени мен Ыйыктын сөзүнөн баш тарткан жокмун.

¹¹Үмүттөнгүдөй, менде кайсы күч бар эле? Өмүрүмдүн аягы эмне экенин билсем, мен аны сабырдуулук менен күтпөйт белем?

¹²Менин кайратым таштай бекем бекен? Денем жез бекен?

¹³Өзүмө өзүм жөлөк болор дарманым барбы? Деги мага тирек болор эмне бар?

¹⁴Эгерде жабыр тартып жаткан адам кудуреттүү Кудайдан коркпой калса да, аны досу аяшы керек.

¹⁵Бирок менин бир туугандарым агын суудай, шар аккан суудай ишенимсиз.

¹⁶Ал – муздан ылайланган суу, ал сууларда кар жашынып жатат.

¹⁷Күн жылыганда, алар эрип кетишет, аптапта өз ордунан жок болуп кетишет.

¹⁸Алар аккан багытын буруп, чөлгө кирип жок болушат.

¹⁹Аларды Тейма жолдору күтүп турат, алардан Шеба жолдору үмүт кылат.

²⁰Бирок үмүттөрү таш кабат. Ал жакка баргандардын уяттан жүзү кызарат.

²¹Азыр силер да мен үчүн ошондой болдуңар, коркунучту көргөндө, жүрөгүңөр түшүп калды.

²²Мен силерге: “Мага бир нерсе бергиле, же болбосо байлыгыңардан мен үчүн төлөп койгула,

²³мени душман колунан куткаргыла, мени кыйнап жаткандын колунан кун төлөп куткарып алгыла”, – деп айттым беле?

²⁴Үйрөткүлө, мен унчукпай калайын. Менин күнөөм эмнеде, көрсөткүлө.

²⁵Чын сөз кандай ачуу! Бирок силердин ашкерелөөңөр эмнени далилдейт?

²⁶Ашкерелегенге сөз ойлоп жатасыңарбы? Сөзүңөрдү текке кетирип жатасыңар.

²⁷Силер жетимге кол салып, өз досуңарга ор казып жатасыңар.

²⁸Эми силерден суранарым, жүзүмө тике карасаңар, силердин алдыңарда мен калп айтмак белем?

²⁹Кайра карап көргүлө, калпы бар бекен? Кайра карап көргүлө, меники туура.

³⁰Менин сөзүмдө жалгандык бар бекен? Кантип эле менин кекиртегим кайгыны ажырата албасын?