Read Кыргыз тилиндеги Библия, 2004 Аюб 7 Bible Online

Аюб 7 - Кыргыз тилиндеги Библия, 2004 bible

Аюб 7

¹Адамдын жердеги жашоо мөөнөтү белгиленген эмеспи? Анын күндөрү жалчынын күндөрүндөй эле эмеспи?

²Кул көлөкөнү эңсегендей, жалчы жумушунун бүтүшүн күткөндөй,

³менин энчиме түйшүктүү айлар тийди, мага кайгылуу түндөр эсептелип берилди.

⁴Жатарымда: “Качан таң атат?” – дейм, бирок түн созула берет, мен таң аткыча кыйналып оодарыла берем.

⁵Денемди курт каптап, карттанып, терилерим жарылып, ириңдеп жатат.

⁶Менин күндөрүм чыгырыктан тез айланып, үмүтсүз өтүп жатат.

⁷Менин өмүрүм жел экенин, көздөрүм кайра жакшылык көрбөстүгүн эсиңден чыгарба.

⁸Мени көргөн көз эми мени көрбөйт. Сен мени бир караганда эле мен жок болом.

⁹Булут суюлуп, тарап кетет. Ошондой эле өлгөндөрдүн жайына түшкөн адам кайра чыкпайт,

¹⁰ал өз үйүнө кайтып келбейт, анын турган жери аны билбей калат.

¹¹Мен тилимди ошондуктан тыйбайм: рухум кыйналганынан улам сүйлөп жатам, жан-дүйнөм жабыр тартканынан улам даттанып жатам.

¹²Сен мага сакчы койгудай, мен деңиз белем же деңизде жашаган коркунучтуу жаныбар белем?

¹³“Төшөгүм сооротот, жаткан жерим кайгы-капамды таратат”, – деп ойлоп жатканымда,

¹⁴Сен мени түштөр менен коркутасың, көрүнүштөр менен үрөйүмдү учурасың.

¹⁵Ошондо менин жаным сөөктөрүм калганга караганда, дем алуумдун токтошун, өлүмдү артык көрөт.

¹⁶Жашоодон жададым. Түбөлүк жашамак белем. Мени өз жайыма кой, анткени менин күндөрүм курулай убаракерчилик.

¹⁷Сен ушунчалык баалагыдай, көңүл бургудай, адам баласы ким?

¹⁸Ага ар таңда келип турасың, көз ирмем сайын аны сынап турасың.

¹⁹Сен качан менден көзүңдү аласың, качан коё бересиң, качан шилекейимди жутканга мүмкүнчүлүк бересиң?

²⁰Эгерде мен күнөө кылган болсом, адам күзөтчүсү болгон Сага эмне кыла алам? Эмне үчүн Сен мени Өзүңө бута кылып алдың? Мен өзүмө өзүм жүк болуп калдым.

²¹Эмне үчүн менин күнөөмдү жууп, мыйзамсыз иштеримди кечирбейсиң? Анткени мен эми топуракка жатам. Эртең мени издейсиң, бирок мен жок болом».