Read Кыргыз тилиндеги Библия, 2004 Аюб 9 Bible Online

Аюб 9 - Кыргыз тилиндеги Библия, 2004 bible

Аюб 9

¹Ошондо Аюб мындай деп жооп берди:

²«Туура! Ушундай экенин билем. Бирок адам Кудайдын алдында кантип актана алат?

³Эгерде адам Кудай менен талашып-тартышкысы келсе, адам Анын миң суроосунун бирине да жооп бере албайт.

⁴Кудай терең акылдуу, күчү зор. Ким Ага каршы чыгып, аман калды?

⁵Тоолорду жылдырат, алар таанылбай калат. Каары кайнаганда, аларды өзгөртүп салат.

⁶Ал жерди ордунан козгогондо, анын түркүктөрү солкулдайт.

⁷Күнгө буйрук берсе, күн чыкпай калат, жылдыздарды жашырып коёт.

⁸Жалгыз Өзү асманды жайып, деңиз толкундарынын үстүндө жүрөт.

⁹Аш, Кесил, Ким топ жылдыздарын жана түштүктөгү жылдыздарды Ал жараткан.

¹⁰Ал укмуштуу, улуу, изилденгис, сансыз кереметтерди жаратат!

¹¹Ал менин бет алдыман өткөндө, мен Аны көрө албайм. Жаныман өткөндө, мен Аны байкай албайм.

¹²Алып кетсе, ким Ага каршы сөз айта алат? “Сен эмне кылып жатасың?” – деп, Ага ким айта алат?

¹³Кудай Өз каарын төкпөй койбойт. Анын алдында Рахаптын жардамчылары баш иет.

¹⁴Андан бетер мен Ага жооп бере аламбы, Анын алдында мен сөз таба аламбы?

¹⁵Меники туура болгон күндө да, жооп бербейм, Өкүмдардын алдында ырайым гана сурайм.

¹⁶Мен Аны чакырганда, Ал мага жооп берсе да, Ал менин үнүмдү укканына ишенбес элем.

¹⁷Ал алай-дүлөй бороондо мага сокку урат, жазыксыз жерден жаратымды ырбатат,

¹⁸жанымды жай алдырбайт, азапка малат.

¹⁹Күчкө салайын десем, Ал эбегейсиз күчтүү. Соттошоюн десем, Аны менен мени ким беттештирет?

²⁰Эгерде мен актана турган болсом, өз тилим эле мени айыпка жыгат. Мен айыпсыз болгон күндө да, Ал мени айыптуу деп табат.

²¹Айыпсызмын мен. Жашагым келбейт, өмүрүмдү жек көрөм!

²²Баары бир. Ошондон улам мен: “Ал айыпсызды да, айыптууну да өлтүрөт”, – деп айттым.

²³Эгерде Ал айыптууну күтпөгөн жерден өлтүрүп жатса, анда айыпсыздын кыйналганына күлөт.

²⁴Жер мыйзамсыздардын колуна берилген. Анын сотторунун жүздөрүн Ал чүмбөттөп койгон. Эгерде Ал болбосо, анда ким?

²⁵Менин өмүрүм чабармандан да тез чуркап, жакшылык көрбөстөн качып бара жатат.

²⁶Ал камыш кайыктай, жемине шукшурулуп келе жаткан бүркүттөй сызып бара жатат.

²⁷Мен: “«Муң-зарымды унутуп, түнөргөн жүзүмдү өзгөртүп, көңүлүмдү көтөрөйүн», – десем да,

²⁸азап тартып калтырап турам, Сен мени жазыксыз деп жарыялабастыгыңды билем.

²⁹Эгерде мен айыптуу болсом, анда эмне үчүн бекер эле кыйналып жатам?

³⁰Мен аппак кардын суусуна жуунсам да, колдорумду таптаза кылып тазаласам да,

³¹Сен мени баткакка батырасың, кийген кийимим менден жийиркенет”.

³²Анткени мен Ага жооп бере тургандай, Аны менен бирге сотко баргыдай, Ал мен сыяктуу адам эмес.

³³Экөөбүздүн ийнибизге колдорун коюп, жараштыра турган ортобузда арачы жок.

³⁴Ал менден таягын тартсын, коркунучу үрөйүмдү учурбасын.

³⁵Ошондо мен сүйлөйм, Андан коркпойм, анткени мен андай эмесмин.