Read Кыргыз тилиндеги Библия, 2004 Забур 101 Bible Online

Забур 101 - Кыргыз тилиндеги Библия, 2004 bible

Забур 101

¹Кыйналган адамдын сыйынуусу. Ал кайгыга чөгүп, Теңирдин алдында өзүнүн кайгысын төгүп жатат.

²Теңирим! Менин сыйынуумду ук, менин муң-зарым Сага жетсин.

³Менден Өз жүзүңдү жашырба, кайгыга чөккөн күнү мага кулак сал. Сени чакырган күнү мени тез ук.

⁴Анткени менин өмүрүм түтүн сыяктуу жок болду, сөөктөрүм чычаладай болуп күйүп калды.

⁵Жүрөгүм жараланып, чөптөй соолуду, ошондуктан мен өз нанымды жегенди да унутуп коюп жатам.

⁶Онтогон үнүм басылбай жатат, этим сөөктөрүмө жабышып калды.

⁷Мен чөлдөгү биргазанга окшоп калдым, урандылардын үстүндөгү үкүдөй болуп калдым.

⁸Уктабай, там башындагы жалгыз куштай болуп отурам.

⁹Күн сайын мени душмандарым кордоп жатышат, жамандык каалагандар мени каргап жатышат.

¹⁰Күлдү нан катары жеп жатам, суусундугумду көз жашым менен аралаштырып ичип жатам.

¹¹Мунун баары Сенин мага каарданганыңдан, жаалданганыңдан улам болуп жатат, анткени Сен мени жогору көтөрдүң да, кайра жерге кулаттың.

¹²Менин өмүрүм өтүп бара жаткан көлөкөдөй, мен чөптөй соолуп калдым.

¹³Теңирим, Сен болсо түбөлүк турасың, Сени муундан-муунга унутушпайт.

¹⁴Сен кайра турасың, Сионду аяйсың, анткени ага ырайым кылуучу убакыт келди, анткени белгиленген убакыт келип калды.

¹⁵Сенин кулдарың анын таштарын да сүйүшөт, анын топурагын да аяшат.

¹⁶Ошондо бүт элдер Теңирдин ысымынан коркуп калышат, жер жүзүндөгү бардык падышалар Сенин даңкыңдан коркуп калышат.

¹⁷Анткени Теңир Сионду кайрадан курат жана Өзүнүн даңкы менен келет.

¹⁸Ал алсыздардын сыйынуусуна назарын салат, алардын жалынуусун жек көрбөйт.

¹⁹Бул келе жаткан муун үчүн жазылып калат, ошондо келе жаткан муун Теңирди даңктайт.

²⁰Анткени Ал Өзүнүн ыйык бийиктигинен жерди карап турат. Теңир асмандан жерге көз салып турат.

²¹Ал туткундардын онтогон үнүн угат, өлүмгө кыйылган уулдарды куткарат.

²²Теңирдин ысымын Сиондо жарыя кылыш үчүн, Иерусалимде Аны макташ үчүн,

²³бүт элдер чогулушат, падышачылыктар Теңирге кызмат кылыш үчүн жыйналышат.

²⁴Теңир менин күчүмдү кетирди, менин күндөрүмдү кыскартты.

²⁵Ошондо мен: «Кудайым! Мени өмүрүмдүн жарымында алып кетпе. Сенин жылдарың түбөлүктүү», – дедим.

²⁶Башында Сен жерди негиздегенсиң, асманды да Сенин колдоруң жараткан.

²⁷Алар жок болушат, Сен болсо түбөлүк жашайсың. Алардын баары чапандай эскирет, Сен аларды кийимдей алмаштырасың, алар өзгөрөт.

²⁸Бирок Сен ошол бойдонсуң, Сенин жылдарыңдын аягы жок.

²⁹Сенин кулдарыңдын уулдары жашашат, алардын тукуму Сенин алдыңда бекем болот.