Read Кыргыз тилиндеги Библия, 2004 Забур 102 Bible Online

Забур 102 - Кыргыз тилиндеги Библия, 2004 bible

Забур 102

¹Дөөттүкү. Менин жаным, Теңирди даңкта; менин бүт ички дүйнөм, Анын ыйык ысымын даңкта.

²Менин жаным, Теңирди даңкта, Анын бардык жакшы иштерин унутпа.

³Ал сенин бардык мыйзамсыз иштериңди кечирет, сенин бүт ооруларыңды айыктырат.

⁴Сенин өмүрүңдү көрдөн куткарат, ырайымы жана мээрими менен чулгайт.

⁵Сенин жашооңду жакшылыкка толтурат, жаштыгың бүркүттүкүндөй жашарат.

⁶Кордук көргөндөргө Теңир адилеттигин жана акыйкаттыгын көрсөтөт.

⁷Ал Өзүнүн жолдорун Мусага, Өзүнүн иштерин Ысрайыл уулдарына көрсөттү.

⁸Теңир кайрымдуу жана ырайымдуу, чыдамдуу жана абдан боорукер.

⁹Ал аягына чейин каарданбайт, Ал түбөлүк ачуулана бербейт.

¹⁰Ал бизге мыйзамсыз иштерибизге жараша жасаган жок, бизди күнөөлөрүбүзгө жараша жазалаган жок.

¹¹Анткени асман жерден кандай бийик болсо, Теңирден корккондорго Анын ырайымы ошондой зор.

¹²Чыгыш батыштан канчалык алыс болсо, Ал биздин мыйзамсыз иштерибизди бизден ошончолук алыстатты.

¹³Атасы балдарына ырайым кылгандай, Теңир Өзүнөн корккондорго ырайым кылат.

¹⁴Анткени Ал биздин түзүлүшүбүздү билет, биздин топурак экенибизди билет.

¹⁵Адамдын өмүрү чөп сыяктуу. Ал талаадагы гүлдөй гүлдөйт.

¹⁶Анын үстүнөн шамал жүрсө, ал жок болот, ал өскөн жер аны тааныбай калат.

¹⁷Ал эми Теңир ырайымын Өзүнөн корккондорго кылымдан кылымга көрсөтөт.

¹⁸Адилеттигин Өзүнүн келишимин сактаган, башкача айтканда, Өзүнүн осуяттарын унутпай аткарган уулдарынын уулдарына көрсөтөт.

¹⁹Теңир Өз тактысын асманга орнотту, Ал бардыгынын үстүнөн падышачылык кылат.

²⁰Теңирдин сөзүнө баш ийип, Анын сөзүн аткарган Анын күчтүү периштелери, Теңирди даңктагыла!

²¹Анын бүт кошуундары, Анын эркин аткарган кызматчылары, Теңирди даңктагыла!

²²Анын бардык иштери, Ал бийлик кылган бардык жерде Теңирди даңктагыла. Менин жаным, Теңирди даңкта!