Read Кыргыз тилиндеги Библия, 2004 Забур 104 Bible Online

Забур 104 - Кыргыз тилиндеги Библия, 2004 bible

Забур 104

¹Теңирди даңктагыла. Анын ысымын чакыргыла. Анын иштерин бүт элдерге жарыя кылгыла.

²Аны мактап ырдагыла, Ага ырдагыла. Анын бардык кереметтери жөнүндө айтып ырдагыла.

³Анын ыйык ысымы менен мактангыла. Теңирди издегендердин жүрөгү кубансын.

⁴Теңирди жана Анын күчүн издегиле, Анын жүзүн ар дайым издегиле.

⁵Ыбрайымдын тукуму, Анын кулдары, Жакыптын уулдары, Анын тандалган адамдары, силер,

⁶Ал жасаган кереметтерди, Анын жышаандарын жана Анын оозунан чыккан өкүмдөрүн эсиңерге салгыла.

⁷Ал биздин Кудай-Теңирибиз. Бүт жер жүзүндө Анын өкүмдөрү ишке ашып жатат.

⁸Ал Өзүнүн келишимин, муундан муунга осуят кылган сөзүн түбөлүккө унутпайт.

⁹Ал сөз – Ыбрайымга берилген осуят, Ыскакка берилген ант.

¹⁰Аны Жакыпка мыйзам кылып, Ысрайылга түбөлүк келишим кылып берген.

¹¹Ал: «Канаан жерин мураска берем», – деген.

¹²Ошол убакта алардын саны аз эле, өтө эле аз эле. Ал жерде алар келгин эл болуп жашап турушкан.

¹³Алар бир элден бир элге, бир өлкөдөн бир өлкөгө барып жер кезишкен.

¹⁴Аларды эч кимге кордоткон эмес, падышаларга мындай деп эскерткен:

¹⁵«Менин майлангандарыма тийбегиле, Менин пайгамбарларыма жамандык кылбагыла».

¹⁶Жерге ачарчылык чакырган, бардык эгинди жок кылган.

¹⁷Алардын алдына бир адамды жиберген: Жусуп кулдукка сатылган.

¹⁸Анын буттарын кишен менен кысышкан, анын жаны темир торго кирген.

¹⁹Теңирдин сөзү ишке ашканга чейин ушундай болду: аны Теңирдин сөзү сынады.

²⁰Падыша киши жиберип, аны эркиндикке чыгарды; аны эл башчысы бошотту.

²¹Төрөлөрүнө өзү каалагандай көрсөтмө берип, аксакалдарга акыл үйрөтүшү үчүн,

²²падыша аны падыша сарайынын, өз мал-мүлкүнүн үстүнө башкаруучу кылып койду.

²³Ошондо Ысрайыл Мисирге келди, Жакып Хам жерине көчүп келди.

²⁴Кудай Өз элин аябай көбөйттү, аны душмандарынан күчтүү кылды.

²⁵Алардын жүрөгүн Өз элин жек көрүүгө, Өз кулдарына каршы куулук кылууга козгоду.

²⁶Анан Өз кулу Мусаны, Өзү тандап алган Арунду жөнөттү.

²⁷Алар Хам жеринде Теңирдин сөзү боюнча жышаандарды жана кереметтерди көрсөтүштү.

²⁸Караңгылык жиберип, караңгы кылды, ошондо эч ким Анын сөзүнө каршы чыккан жок.

²⁹Алардын сууларын канга айландырып, балыктарын кырып жок кылды.

³⁰Алардын жерин, атүгүл, падышаларынын уктоочу бөлмөлөрүн да курбака каптап калды.

³¹Ал айтары менен, алардын бардык жерин ар кандай курт-кумурска, чымын-чиркей каптап калды.

³²Алардын жерине жамгыр ордуна мөндүр, куйкалаган от жиберди.

³³Алардын жүзүмзарлары менен анжырларын талкалады, алардын аймагындагы бак-дарактарды кыйратты.

³⁴Ал айтары менен, сан жеткис чегиртке, кырк аяк каптап калды.

³⁵Алардын жериндеги чөптүн баарын, талааларындагы жемиштерди жеп салышты.

³⁶Теңир ошол жердеги бардык тунгучтарды, алардын күч башаттарынын баарын кырып салды.

³⁷Анан ысрайылдыктарды алтын, күмүш менен алып чыкты, алардын урууларында ооругандар болгон жок.

³⁸Мисир эли алардын кеткенине кубанды, анткени алардан коркуп калышкан эле.

³⁹Теңир аларды калкалоого булут жөнөттү, аларга түн ичинде жарык берип турушу үчүн, от жиберди.

⁴⁰Алар сурашты, ошондо Ал бөдөнөлөрдү жиберди, аларды асман наны менен тойгузду.

⁴¹Ташты жарды, ошондо суулар акты, суулар кургак жерлерге дарыя болуп акты.

⁴²Анткени Ал Өз кулу Ыбрайымга айткан Өзүнүн ыйык сөзүн эстеди.

⁴³Ошентип, Ал Өз элин кубаныч менен алып чыкты, Өзүнүн тандалган адамдарын салтанат менен алып чыкты.

⁴⁴Алар Өзүнүн буйруктарын аткарышы үчүн, мыйзамдарын сакташы үчүн,

⁴⁵Теңир аларга башка элдердин жерлерин берди, алар бөлөк элдердин мал-мүлкүн ээлеп алышты. Теңирди даңктагыла!