Read Кыргыз тилиндеги Библия, 2004 Забур 105 Bible Online

Забур 105 - Кыргыз тилиндеги Библия, 2004 bible

Забур 105

¹Теңирди даңктагыла. Теңирди даңктагыла, анткени Ал жакшы, анткени Анын ырайымы түбөлүктүү.

²Кудайдын кудуреттүү иштерин ким айтып бүтө алат? Анын бүт даңкын ким жар салып бүтө алат?

³Акыйкаттыкты сактагандар жана адилет иш кылгандар бактылуу!

⁴Өз элиңе ырайым кылганда, мени эсте, Теңирим. Мага Өзүңдүн куткарууң менен кел!

⁵Өзүң тандап алгандардын жыргал турмушун көрөйүн, элиңдин кубанганын көрүп кубанайын, Өзүңдүн мурасың менен сыймыктанайын.

⁶Биз өзүбүздүн ата-бабаларыбызга окшоп күнөө кетирдик, мыйзамсыз иштерди кылдык, жалган иштерди жасадык.

⁷Биздин ата-бабаларыбыз Мисирде Сенин кереметтериңди түшүнүшкөн жок, Сенин көп жолу көрсөткөн ырайымыңды эстешкен жок, деңиздин жанында, Кызыл деңиздин жанында нааразы болушту.

⁸Бирок Теңир аларды Өз ысымы үчүн, Өз кудуретин көрсөтүү үчүн куткарды.

⁹Ал Кызыл деңизге катуу сүйлөдү эле, ал соолуп калды. Аларды тереңдиктен кургак жер менен өткөндөй алып өттү.

¹⁰Аларды жек көргөндөрдүн колунан куткарды, душмандардын колунан бошотту.

¹¹Суу алардын душмандарын басып калды, алардын бири да тирүү калган жок.

¹²Ошондо алар Теңирдин сөзүнө ишенип, Аны даңктап ырдашты.

¹³Бирок Анын иштерин тез эле унутуп коюшту, Анын буйруктарын күтүшкөн жок.

¹⁴Алар чөлдө каалоолоруна берилишти, Кудайды эл жашабаган жерде сынашты.

¹⁵Теңир алардын сураганын аткарды, бирок алардын жандарына оору жиберди.

¹⁶Алар кошуунда Теңирдин ыйыктары Муса менен Арунга көз артышты.

¹⁷Жер ачылып, Датанды жутуп алды; Абырамды тууган-уругу менен кошо жер басып калды.

¹⁸Алар топтошкон жерден от чыкты, кудайсыздарды жалын күйгүзүп кетти.

¹⁹Алар Хореп тоосунда музоо жасап алып, ошол жасалма кудайга табынышты.

²⁰Ошентип, өздөрүнүн даңкын чөп жеген музоонун айкелине алмаштырышты.

²¹Мисирде улуу ишти жасаган өздөрүнүн куткаруучу Кудайын унутуп коюшту.

²²Анын Хам жеринде көрсөткөн кереметтерин, Кызыл деңизде кылган коркунучтуу иштерин унутуп коюшту.

²³Ошондо Кудай аларды кырып салгысы келди, бирок Кудайдын тандап алган адамы Муса Анын каарын токтотуу үчүн, асканын жаракасына тура калды, болбосо Кудай алардын баарын кырып салмак.

²⁴Алар өздөрү эңсеген жерди жек көрүштү, Анын сөзүнө ишенишкен жок.

²⁵Өз чатырларында наалышты, Теңирдин үнүнө кулак салышкан жок.

²⁶Ошондо Кудай Өзүнүн колун көтөрүп, аларды чөлдө жок кылам деп,

²⁷алардын тукумун башка элдердин арасында кыйратам деп, аларды жер жүзүнө таратып жиберем деп ант берди.

²⁸Алар Баал-Пейор деген жасалма кудайга жабышып, жансыз кудайларга чалынган курмандыктарды жешти.

²⁹Алар Кудайды өздөрүнүн иштери менен каардантышты, ошондо аларды жугуштуу оору каптады.

³⁰Пинехас чыгып, акыйкат чара көрдү, ошондо жугуштуу оору токтоду.

³¹Бул ага кылымдар бою, укумдан-тукумга адилеттик катары эсептелинди.

³²Алар Мериба суусунун боюнда Кудайды каардантышты, алар үчүн Муса жабыр тартты.

³³Анткени алар анын рухун капалантышты, ошондо Муса тили менен күнөө кетирди.

³⁴Алар Теңир айткан элдерди жок кылышкан жок.

³⁵Тескерисинче, бутпарас элдер менен аралашып, алардын иштерин үйрөнүп алышты.

³⁶Алардын жасалма кудайларына кызмат кылышты, ошолор алар үчүн тор болду.

³⁷Өздөрүнүн уулдары менен кыздарын жиндерге курмандыкка чалышты.

³⁸Айыпсыз кан төгүштү, өздөрүнүн уулдары менен кыздарынын канын төгүштү, аларды канаандыктардын жасалма кудайларына арнап курмандыкка чалышты. Ошентип, жер кан менен булганды.

³⁹Өз иштери менен өздөрүн булгашты, иш-аракети менен бузукулук кылышты.

⁴⁰Ошондо Кудай Өз элине каарданды, Өз мурасынан жийиркенди.

⁴¹Ошон үчүн аларды бутпарастардын колуна салып берди, аларды жек көргөндөр аларды башкарып калышты.

⁴²Аларды өз душмандары кысымга алышты, алар душмандарынын кол астында моюн сунушту.

⁴³Теңир аларды көп жолу куткарган эле, бирок алар Теңирди өздөрүнүн кежирлиги менен каардантышты. Ошентип, алар өздөрүнүн мыйзамсыз иштери үчүн кордолушту.

⁴⁴Бирок Кудай алардын ыйын укканда, алардын кайгысына назар салды.

⁴⁵Өзүнүн алар менен түзгөн келишимин эстеди. Аябай ырайымдуу болгондуктан, аларды аяды.

⁴⁶Аларды туткундагандардын жүрөгүндө боорукердикти ойготту.

⁴⁷Бизди куткар, Кудай-Теңирибиз, бизди башка элдердин арасынан чогултуп ал. Биз Сенин ыйык ысымыңды даңктайлы, Сенин даңкың менен мактаналы.

⁴⁸Ысрайылдын Кудай-Теңири кылымдан кылымга даңктала берсин! Ошондо бүт эл: «Оомийин! Теңирди даңктагыла!» – десин.