Read Кыргыз тилиндеги Библия, 2004 Забур 106 Bible Online

Забур 106 - Кыргыз тилиндеги Библия, 2004 bible

Забур 106

¹«Теңирди даңктагыла, анткени Ал жакшы, анткени Анын ырайымы түбөлүктүү!»

²Душмандын колунан Теңир Өзү куткарып алгандар ушинтип айтышсын.

³Кудай аларды чыгыш менен батыштагы, түндүк менен түштүктөгү өлкөлөрдөн чогултту.

⁴Алар чөлдө, эл жүрбөгөн жолдо адашып жүрүштү, эл отурукташкан шаар таба алышпады.

⁵Ачка болушту, суусашты, алардын жаны алсырады.

⁶Алар кыйналганда, Теңирди чакырышты, ошондо Теңир аларды кыйынчылыктарынан куткарды.

⁷Аларды эл отурукташкан шаарга жеткириш үчүн, түз жол менен алып барды.

⁸Теңирди ырайымы үчүн, адам баласына көрсөткөн керемет иштери үчүн даңкташсын!

⁹Анткени Ал суусагандын суусунун кандырды, ачка болгонду жакшылыкка тойгузду.

¹⁰Алар азап чегип, темир менен кишенделип, караңгыда, өлүм көлөкөсүндө отурушту.

¹¹Анткени алар Кудайдын сөздөрүнө моюн сунбай коюшту, Бардыгынан Жогору Тургандын чечимдерин четке кагышты.

¹²Теңир алардын жүрөгүн оор жумуш менен моюн сундурду; алар мүдүрүлүп жыгылганда, жардам берер эч ким болгон жок.

¹³Алар кыйналганда, Теңирди чакырышты, ошондо Теңир аларды кыйынчылыктарынан куткарды.

¹⁴Теңир аларды караңгылыктан жана өлүм көлөкөсүнөн куткарды, аларды байлаган кишендерди талкалады.

¹⁵Теңирди ырайымы үчүн, адам баласына көрсөткөн керемет иштери үчүн даңкташсын!

¹⁶Анткени Ал жез дарбазаларды талкалады, темир торлорду сындырды.

¹⁷Акылы жоктор өздөрүнүн мыйзамсыз жолдору үчүн, жалган иштери үчүн азап тартышты.

¹⁸Алардын жаны ар кандай тамакты танды, алар өлүм дарбазасына жакындап калышкан.

¹⁹Алар кыйналганда, Теңирди чакырышты, ошондо Теңир аларды кыйынчылыктарынан куткарды.

²⁰Ал Өз Сөзүн жиберип, аларды айыктырды, аларды өздөрүнүн көрүнөн куткарды.

²¹Теңирди ырайымы үчүн, адам баласына көрсөткөн керемет иштери үчүн даңкташсын!

²²Ага мактоо курмандыгын арнагыла, Анын кылган иштерин ыр менен жар салгыла!

²³Кеме менен деңизге чыккандар, чоң сууларда иш жүргүзгөндөр

²⁴Теңирдин иштерин жана кереметтерин деңиздин тереңинен көрүшөт:

²⁵Ал сүйлөгөндө катуу шамал болуп, анын толкундарын бийик көтөрөт.

²⁶Алар асманга чейин көтөрүлүп, деңиздин түбүнө түшөт. Баштарына кыйынчылык түшкөндө, алардын жаны кыйналат.

²⁷Алар мас кишидей теңселип, темтеңдешет, ошондо алардын бүт акылмандыгы жоголот.

²⁸Алар кыйналганда, Теңирди чакырышты, ошондо Теңир аларды кыйынчылыктарынан куткарды.

²⁹Ал бороонду тынчтандырат, ошондо толкундар басылат.

³⁰Ошондо алар толкундун басылганына кубанышат, Теңир аларды өздөрү каалаган кеме токтоочу жерге жеткирет.

³¹Теңирди ырайымы үчүн, адам баласына көрсөткөн керемет иштери үчүн даңкташсын!

³²Аны элдердин жыйынында даңазалашсын, Аны аксакалдар жыйынында даңкташсын!

³³Ал дарыяларды чөлгө айландырат, суу башаттарын кургактыкка айландырат.

³⁴Тургундарынын мыйзамсыздыгы үчүн түшүмдүү жерди шор жерге айландырат.

³⁵Ал чөлдү көлгө айландырат, какшыган жерди суу башаттарына айландырат.

³⁶Ал жерге ач-жылаңачтарды отурукташтырат, алар ал жерге шаар куруп жашашат.

³⁷Талааларга эгин айдашат, жүзүмзар отургузушат, жүзүмзарлар аларга мол түшүм берет.

³⁸Кудай аларга батасын берет, ошондо алар сан жеткис болуп көбөйүшөт, алардын малы да азайбайт.

³⁹Алар азайышты; алар эзүүдөн, кыйынчылыктардан, кайгыдан кырылышты.

⁴⁰Ал төрөлөрдү уятка калтырып, аларды жолдору жок чөлдө адаштырып таштайт.

⁴¹Жакырды болсо кыйынчылыктан куткарат, анын укум-тукумун короо-короо койлордой көбөйтөт.

⁴²Адил адамдар муну көрүп кубанышат, ал эми кудайсыздар ооздорун басышат.

⁴³Ким акылдуу болсо, ал муну байкайт жана Теңирдин ырайымын түшүнөт.