Read Кыргыз тилиндеги Библия, 2004 Забур 108 Bible Online

Забур 108 - Кыргыз тилиндеги Библия, 2004 bible

Забур 108

¹Ырчылар тобунун башчысына. Дөөттүн забуру. Мен даңктаган Кудай! Унчукпай койбо.

²Анткени кудайсыздар менен арамзалар мага каршы ооздорун ачышты, алар мага калп сүйлөп жатышат.

³Мага бардык жактан, туш-туштан жек көрүү менен сүйлөшөт, мага каршы себепсиз эле куралданып жатышат.

⁴Сүйүүм үчүн алар мага каршы чыгып жатышат, мен болсо сыйынып жатам.

⁵Жакшылыгым үчүн мага жамандык кылып жатышат, сүйүүм үчүн мени жек көрүп жатышат.

⁶Анын үстүнө кудайсызды кой, айыптоочу анын оң жагында турсун.

⁷Сот болгондо, күнөөлүү болуп чыксын, анын сыйынуусу күнөө болуп эсептелсин.

⁸Анын өмүрү кыска болсун, анын ардактуу ордун башка бирөө алсын.

⁹Анын балдары жетим калсын, аялы жесир калсын.

¹⁰Балдары тентип, кайыр сурашсын, өздөрүнүн ураган үйүнүн алдында тамак сурап отурушсун.

¹¹Карыз берген адам анын болгон нерсесин көтөрүп кетсин, анын эмгегин башка бирөөлөр талап кетишсин.

¹²Ага эч кимдин боору оорубасын, анын жетимдерине эч ким ырайым кылбасын.

¹³Анын тукуму кырылсын, алардын аты өчсүн.

¹⁴Анын ата-бабаларынын мыйзамсыз иштери Теңирдин алдында унутулбасын, анын энесинин күнөөсү өчүрүлбөсүн.

¹⁵Алар ар дайым Теңирдин көз алдында болушсун, Теңир алардын ысымын жер үстүнөн өчүрсүн.

¹⁶Анткени ал ырайым кылуу жөнүндө ойлогон жок, тескерисинче, бей-бечара, жакыр, жүрөгү жаралуу адамды өлтүрүш үчүн куугунтукка алган.

¹⁷Каргышты жакшы көрдү, ал анын башына тийди. Батаны каалаган жок, андан ажырады.

¹⁸Каргышты чапандай кийип жүрсүн; каргыш суудай болуп, анын ичине кирсин; майдай болуп, анын сөөгүнө кирсин.

¹⁹Каргыш ага кийип жүргөн кийимдей болсун, ар дайым өзү курчанып жүргөн курдай болсун.

²⁰Менин душмандарым жана мага каршы сүйлөгөндөр Теңирден ушундай жаза алышат!

²¹Мага болсо, Теңирим, Теңирим, Өз ысымың үчүн кыл, анткени Сенин ырайымың жакшы, мени куткар.

²²Анткени мен жардымын жана жакырмын, менин жүрөгүм жаралуу.

²³Мен өтүп бара жаткан көлөкөдөй жок болуп бара жатам. Мени чегирткедей кубалап жатышат.

²⁴Орозодон тизелерим алсырады, денемден май кетти.

²⁵Мен аларга күлкү болдум. Мени көргөндө, баштарын чайкашат.

²⁶Мага жардам бер, Теңирим, Кудайым! Мени Өзүңдүн ырайымың менен куткар.

²⁷Теңирим, бул Сенин колуң экенин, муну Сен кылганыңды билишсин.

²⁸Алар каргап жатышат, бирок Сен мага батаңды бер, алар каршы чыгып жатышат, бирок уятка калышсын, Өзүңдүн кулуң болсо кубансын.

²⁹Душмандарымдын абийири төгүлсүн, шылдыңды кийимдей кийишсин.

³⁰Ошондо мен катуу үн менен Теңирди даңктайм, сансыз элдин арасында Аны даңазалайм.

³¹Анткени жанын соттогондордон куткаруу үчүн, Теңир жакырдын оң жагында турат.