Read Кыргыз тилиндеги Библия, 2004 Забур 11 Bible Online

Забур 11 - Кыргыз тилиндеги Библия, 2004 bible

Забур 11

¹Ырчылар тобунун башчысына. Сегиз кылдуу аспап менен. Дөөттүн забуру.

²Теңир, куткар, анткени адил адамдар калбай калды, адам баласынын арасында ишенимдүүлөр жок.

³Ар ким өз жакынына жалган айтууда. Жүрөктөрүнүн анткорлугунан кошомат кылып сүйлөшөт.

⁴Теңир текебердене сүйлөгөндөрдү, кооздоп сүйлөгөндөрдү кырып жок кылат.

⁵«Биз тилибиз менен жеңебиз, оозубуз өзүбүздүкү, эмне айтсак, өзүбүз билебиз, бизге ким кожоюн экен?» дегендерди Теңир жок кылат.

⁶«Кедейлерди талап-тоноп жатышкандыктан, жакырлар онтоп жатышкандыктан, азыр ордуман турам да, мыйзамсыз тарабынан кысымга алынып жаткан адамга жардам берем», – дейт Теңир.

⁷Теңирдин сөздөрү – таза сөздөр, топурактан тазаланып, меште жети жолу эритилген күмүш.

⁸Теңир, Сен аларды сактайсың, аларды ушундай адамдардан түбөлүккө коргойсуң.

⁹Адамдардын начары жогору көтөрүлгөндө, бардык жерде кудайсыздар көбөйөт.