Read Кыргыз тилиндеги Библия, 2004 Забур 111 Bible Online

Забур 111 - Кыргыз тилиндеги Библия, 2004 bible

Забур 111

¹Теңирди даңктагыла. Теңирден корккон жана Анын осуяттарын чын жүрөктөн сүйгөн адам бактылуу.

²Анын тукуму жер үстүндө күчтүү болот. Адил адамдардын тукуму Кудайдын батасын алат.

³Анын үйүндө молчулук жана байлык болот, анын адилеттиги түбөлүктүү.

⁴Караңгыда адил адамдарга жарык болот, анткени Ал ырайымдуу, боорукер жана адилет.

⁵Жакшы адам ырайым кылып, карыз берет. Ал өз иштерин адилеттик менен жүргүзөт.

⁶Ал эч качан мүдүрүлбөйт, адил адам эч качан унутулбайт.

⁷Ал жаман сөздөн коркпойт, Теңирге таянгандыктан, анын жүрөгү бекем.

⁸Анын жүрөгү туруктуу. Ал душмандарын көргөндө, коркуп кетпейт.

⁹Ал өзүнүн мал-мүлкүн жакырларга марттык менен таратып берди. Анын адилеттиги түбөлүктүү, анын мүйүзү даңк менен көккө көтөрүлөт.

¹⁰Кудайсыз адам муну көрүп ачууланат, тиштерин кычыратып, өзүнөн өзү жок болот. Кудайсыздардын тилеги орундалбайт.