Read Кыргыз тилиндеги Библия, 2004 Забур 113 Bible Online

Забур 113 - Кыргыз тилиндеги Библия, 2004 bible

Забур 113

¹Ысрайыл эли Мисирден, Жакыптын тукуму бөлөк элдердин арасынан чыккан кезде,

²Жүйүт Теңирдин ыйык эли болуп калды, Ысрайыл Анын энчиси болуп калды.

³Муну көрүп, деңиз артка качты; Иордан артты көздөй акты.

⁴Тоолор койлордой, адырлар козулардай секирди.

⁵Деңиз, сага эмне болду, эмнеге артка качтың? Иордан, сага эмне болду, эмнеге артты көздөй актың?

⁶Тоолор, силер эмне үчүн койлордой, адырлар, силер эмне үчүн козулардай секирип жатасыңар?

⁷Жер, Теңирдин алдында, Жакыптын Кудайынын алдында титире.

⁸Ал асканы көлдүн суусуна, ташты булакка айландырат.

⁹Бизди эмес, Теңир, бизди эмес, Өз ырайымың үчүн, Өз чындыгың үчүн Өз ысымыңды даңкта!

¹⁰Бутпарастар: «Булардын Кудайы кайда?» – деп айтышпасын.

¹¹Биздин Кудайыбыз асманда; эмнени кааласа, ошону кылат.

¹²Ал эми тигилердин жасалма кудайлары – күмүш жана алтын, адамдын колу менен жасалган нерселер.

¹³Алардын ооздору бар, бирок сүйлөбөйт; алардын көздөрү бар, бирок көрбөйт.

¹⁴Алардын кулактары бар, бирок укпайт; алардын мурундары бар, бирок жыт билбейт.

¹⁵Алардын колдору бар, бирок сезбейт; алардын буттары бар, бирок баса албайт; алардын көмөкөйүнөн үн чыкпайт.

¹⁶Аларды жасагандар жана алардан үмүт кылгандардын баары ошолорго окшоп калышсын.

¹⁷Ысрайыл тукуму! Теңирге таян: Ал биздин жардам берүүчүбүз жана калканыбыз.

¹⁸Арундун тукуму! Теңирге таян: Ал биздин жардам берүүчүбүз жана калканыбыз.

¹⁹Теңирден корккондор! Теңирге таянгыла: Ал биздин жардам берүүчүбүз жана калканыбыз.

²⁰Теңир бизди унуткан жок, бизге батасын берип жатат, Ысрайылдын тукумуна батасын берип жатат, Арундун тукумуна батасын берип жатат.

²¹Ал Теңирден корккондорго – чоңдорго да, кичинелерге да батасын берип жатат.

²²Теңир силерге да, силердин балдарыңарга да мындан да көп батасын берсин.

²³Силер асман менен жерди жараткан Теңирден бата алгансыңар.

²⁴Асман – Теңирдин асманы, ал эми жерди Ал адам баласына берген.

²⁵Теңирди өлгөндөр, көргө киргендердин бири да даңазалабайт.

²⁶Бирок биз Теңирди азыр жана түбөлүккө даңазалайбыз.