Read Кыргыз тилиндеги Библия, 2004 Забур 118 Bible Online

Забур 118 - Кыргыз тилиндеги Библия, 2004 bible

Забур 118

¹Туура жолдо жүргөндөр, Теңирдин мыйзамын сактагандар бактылуу.

²Анын мыйзамдарын сактагандар, Аны чын жүрөгү менен издегендер бактылуу.

³Алар мыйзамсыз иштерди кылышпайт, Анын жолдору менен жүрүшөт.

⁴Сен Өзүңдүн буйруктарыңды бекем сактоону осуят кылгансың.

⁵Оо, менин жолдорум Сенин мыйзамдарыңды аткарууга багыт алса кана!

⁶Анда мен Сенин осуяттарыңды карап, уят болбос элем.

⁷Мен Сенин адилет мыйзамдарыңды үйрөнүп, Сени таза жүрөгүм менен даңктар элем.

⁸Сенин көрсөтмөлөрүңдү сактайм, мени таптакыр таштап койбо.

⁹Жаш жигит өз жолун канткенде таза сактап жүрө алат? Өзүн Сенин сөзүң боюнча сактаганда гана.

¹⁰Сени бүт жүрөгүм менен издейм, Өзүңдүн осуяттарыңдан четтеп кетүүмө жол бербе.

¹¹Сенин алдыңда күнөө кылбаш үчүн, мен Сенин сөзүңдү жүрөгүмө катып алдым.

¹²Теңир, Сага даңк! Мага Өз мыйзамдарыңды үйрөт.

¹³Сенин оозуңдан чыккан өкүмдөрүңдүн баарын өз оозум менен жар салдым.

¹⁴Мен Сенин осуяттарыңды аткарганда, ар кандай байлыкка кубангандардай кубанам.

¹⁵Сенин осуяттарың жөнүндө ойлоном, Сенин жолдоруңа назар салам.

¹⁶Сенин көрсөтмөлөрүң менен соороном, Сенин сөздөрүңдү эсимден чыгарбайм.

¹⁷Сенин сөздөрүңдү сактап жашашым үчүн, Өз кулуңа ырайымыңды көрсөт.

¹⁸Сенин мыйзамыңдын кереметтерин көрүшүм үчүн, менин көздөрүмдү ач.

¹⁹Мен жер үстүндө келгинмин, менден Өзүңдүн осуяттарыңды жашырба.

²⁰Ар убакта Сенин мыйзамдарыңды эңсегендиктен, жаным кыйналып бүттү.

²¹Сен текеберлерди, каргыш тийгендерди, Өзүңдүн осуяттарыңдан баш тарткандарды моюн сундурдуң.

²²Мени шылдың менен кордуктан куткар, анткени мен Сенин осуяттарыңды сактап жүрөм.

²³Төрөлөр отуруп алып, мага каршы сүйлөшүп жатышат. Сенин кулуң болсо Сенин мыйзамдарың жөнүндө ойлонуп жатат.

²⁴Сенин осуяттарың менин сооронучум, менин кеңешчилерим.

²⁵Жаным топуракка матырылды, мени Өзүңдүн сөзүң менен тирилт.

²⁶Мен өз жолдорум жөнүндө айтып бердим, Сен мени уктуң. Мага Өзүңдүн мыйзамдарыңды үйрөт.

²⁷Мага Өзүңдүн буйруктарыңдын жолун түшүнүүгө акыл бер, ошондо мен Сенин кереметтериң жөнүндө ой жүгүртөм.

²⁸Менин жаным кайгыдан алсырап бара жатат, мага Өзүңдүн сөзүң менен күч бер.

²⁹Мени жалган жолдон алыстат, мага Өз мыйзамыңды бер.

³⁰Мен чындык жолун тандап алдым, Сенин мыйзамдарыңды өзүмдүн алдыма койдум.

³¹Мен Сенин осуяттарыңа жабыштым, Теңир, мени уятка калтырба.

³²Сен менин жүрөгүмдү кенен ачканда, мен Сенин осуяттарыңдын жолдору менен жүрөм.

³³Мага Өз мыйзамдарыңдын жолун көрсөт, Теңир, ошондо мен Сенин мыйзамдарыңды өмүрүмдүн аягына чейин сактайм.

³⁴Мени акылга келтир, ошондо мен Сенин мыйзамыңды сактайм, аны бүт жүрөгүм менен аткарам.

³⁵Мени осуяттарыңдын чыйыр жолуна сал, анткени мен ошол жолду каалайм.

³⁶Менин жүрөгүмдү дүнүйөкордукка эмес, Өзүңдүн осуяттарыңа бур.

³⁷Курулай убаракерчиликтен көзүмдү бур. Өз жолуңда жүрүүгө күч бер.

³⁸Сенден коркушу үчүн, Өз кулуңдун жүрөгүндө Өз сөзүңдү бекемде.

³⁹Мени өзүм коркуп жаткан кордуктан куткар, анткени Сенин өкүмдөрүң жакшы.

⁴⁰Мына, Мен Сенин буйруктарыңды каалап жатам, мени Өз чындыгың менен тирилт.

⁴¹Теңир, мага Өзүңдүн ырайымың, Өзүңдүн сөзүң боюнча куткарууң келсин.

⁴²Ошондо мен өзүмдү кордогонго жооп бере алам, анткени мен Сенин сөзүңө таянам.

⁴³Чындык сөздөрүңдү менин оозумдан таптакыр алып салба, анткени мен Сенин адилет өкүмүңдү күтүп жатам.

⁴⁴Сенин мыйзамыңды дайыма, түбөлүккө сактайм.

⁴⁵Эркин болом, анткени Сенин буйруктарыңды издедим.

⁴⁶Сенин осуяттарың тууралуу падышалардын алдында айтам, уялбайм.

⁴⁷Өзүм сүйгөн Сенин осуяттарың менен соороном.

⁴⁸Колдорумду өзүм сүйгөн Сенин осуяттарыңа сунам, Сенин мыйзамдарың жөнүндө ой жүгүртөм.

⁴⁹Кулуңа айткан Өз сөзүңдү эсте, Сен ошол сөзүң аркылуу мага үмүт бергенсиң.

⁵⁰Ал менин кыйынчылык учурундагы сооронучум, анткени Сенин сөзүң мени тирилтет.

⁵¹Текеберлер мени абдан шылдыңдашты, бирок мен Сенин мыйзамыңдан четтеген жокмун.

⁵²Теңир, мен Сенин байыркы мыйзамдарыңды эстеп соороном.

⁵³Сенин мыйзамыңды таштап салган кудайсыздарды көргөндө, үрөйүм учат.

⁵⁴Мен жер кезген жерлерде Сенин мыйзамдарың менин ырым болду.

⁵⁵Теңирим, түн ичинде да Сенин ысымыңды эстедим, Сенин мыйзамыңды сактадым.

⁵⁶Ал меники болуп калды, анткени мен Сенин мыйзамдарыңды сактап жүрөм.

⁵⁷«Теңирим, Сенин сөздөрүңдү аткаруу – менин энчим», – деп айттым.

⁵⁸Мен Сага чын жүрөгүмдөн: «Мага Өз сөзүң боюнча ырайым кыл», – деп сыйынгам.

⁵⁹Өз жолдорум жөнүндө ойлонуп, буттарымды Сенин осуяттарыңа бурдум.

⁶⁰Сенин осуяттарыңды дароо аткарууга ашыктым.

⁶¹Кудайсыздар мага тор жайышты, бирок мен Сенин осуяттарыңды унуткан жокмун.

⁶²Сени адилет өкүмдөрүң үчүн даңктоого түн ортосунда турчумун.

⁶³Сенден корккондорго, Сенин буйруктарыңды аткаргандарга шерикмин.

⁶⁴Жер бети Сенин ырайымыңа толгон, Теңирим. Мага Өзүңдүн мыйзамдарыңды үйрөт.

⁶⁵Теңирим, Өз сөзүң боюнча кулуңа жакшылык кылдың.

⁶⁶Мени туура ой жүгүртүүгө үйрөт, туура түшүнүк бер, анткени мен Сенин осуяттарыңа ишенем.

⁶⁷Азап тартканга чейин, мен адашып жүргөм, азыр болсо Сенин сөзүңдү сактап жүрөм.

⁶⁸Сен жакшысың, жакшылык кыласың, мага Өзүңдүн мыйзамдарыңды үйрөт.

⁶⁹Текеберлер мен жөнүндө жалган ушак таратып жатышат, мен болсо Сенин буйруктарыңды чын жүрөгүмдөн аткарам.

⁷⁰Алардын жүрөгүн май басты, мен болсо Сенин мыйзамың менен соороном.

⁷¹Сенин мыйзамдарыңды үйрөнүш үчүн, азап тартканым жакшы болду.

⁷²Сенин оозуңдан чыккан мыйзам мен үчүн миңдеген алтындан да, күмүштөн да артык.

⁷³Мени Сенин колдоруң жаратты, мени Сенин колдоруң жасады. Мага акыл бер, ошондо мен Сенин осуяттарыңды үйрөнөм.

⁷⁴Сенден корккондор Сенин сөзүңө таянганымды көрүп кубанышат.

⁷⁵Теңир, Сенин өкүмдөрүң адилет экенин, мени адилеттик менен жазалаганыңды билем.

⁷⁶Сенин ырайымың Өз кулуңа айткан сөзүң боюнча менин сооронучум болсо экен.

⁷⁷Мага боор оорусаң экен, ошондо мен жашайм, анткени Сенин мыйзамың менин сооронучум.

⁷⁸Текеберлер уятка калышсын, анткени алар мени ак жерден кыйнап жатышат. Мен болсо Сенин буйруктарың жөнүндө ойлонуп жатам.

⁷⁹Сенден корккондор, Сенин осуяттарыңды билгендер мага кайрылышсын.

⁸⁰Уятка калбашым үчүн, жүрөгүм Сенин мыйзамдарың боюнча таза болсун.

⁸¹Сенин куткарууңду күтө берип, жаным алсырап баратат. Бирок Сенин сөзүңө таянам.

⁸²Сенин сөзүңдү күтө берип, көзүм талыды. «Мени качан сооротосуң?» – дейм.

⁸³Мен ышталган чаначтай болуп калдым, бирок Сенин мыйзамдарыңды унуткан жокмун.

⁸⁴Кулуң дагы канча күн күтсүн? Мени куугунтуктагандарды качан жазалайсың?

⁸⁵Сенин мыйзамыңа каршы текеберлер мага ор казышты.

⁸⁶Сенин осуяттарыңдын баары – чындык. Мени ак жерден куугунтуктап жатышат, мага жардам бер.

⁸⁷Алар мени жер үстүнөн жок кылып коё жаздашты, бирок мен Сенин буйруктарыңды унуткан жокмун.

⁸⁸Мени Өзүңдүн ырайымың менен тирилт, ошондо мен Сенин оозуңдан чыккан буйруктарды аткарам.

⁸⁹Теңирим, Сенин сөзүң асманда түбөлүккө орногон.

⁹⁰Сен түбөлүккө ишенимдүүсүң. Жерди Сен орноттуң, ал ошон үчүн турат.

⁹¹Бардыгы ушул убакка чейин Сенин мыйзамдарың боюнча турат, анткени баары Сага кызмат кылат.

⁹²Сенин мыйзамың мага сооронуч болбогондо, мен кайгыдан өлүп калмакмын.

⁹³Сенин буйруктарыңды түбөлүккө унутпайм, анткени Сен мени ошолор аркылуу тирилттиң.

⁹⁴Мен Сеникимин, мени куткар, анткени мен Сенин буйруктарыңды издедим.

⁹⁵Кудайсыздар мени өлтүрүш үчүн, аңдып жүрүшөт. Мен болсо Сенин осуяттарыңа көңүл коём.

⁹⁶Мен ар кандай жеткилеңдиктин чегин көрдүм, бирок Сенин осуятыңдын чеги жок.

⁹⁷Мен Сенин мыйзамыңды кандай жакшы көрөм! Күнү бою ошол жөнүндө ойлоном.

⁹⁸Өз осуятың менен Сен мени душмандарымдан акылдуу кылдың, анткени ал дайыма мени менен.

⁹⁹Устаттарымдын баарынан акылдуу болуп калдым, анткени мен Сенин осуяттарың жөнүндө ойлоном.

¹⁰⁰Карыяларга караганда көптү билип калдым, анткени мен Сенин буйруктарыңды аткарып жүрөм.

¹⁰¹Сенин сөзүңдү сакташ үчүн, буттарымды ар кандай жаман жолдордон сактайм.

¹⁰²Сенин мыйзамдарыңдан четтебейм, анткени Сен мени үйрөтүп жатасың.

¹⁰³Сенин сөздөрүң менин таңдайымда кандай таттуу! Алар менин оозумда балдан да таттуу.

¹⁰⁴Мен Сенин буйруктарың аркылуу акылыма келгем, ошондуктан ар кандай жалган жолду жек көрөм.

¹⁰⁵Сенин сөзүң – бутума шам, жолума жарык.

¹⁰⁶Мен Сенин адилет мыйзамдарыңды сактоону убада кылгам, ошондуктан аткарам.

¹⁰⁷Теңир, мен абдан кыйналдым, мени Өз сөзүң боюнча тирилт.

¹⁰⁸Теңирим, менин оозумдан чыккан мактоо курмандыгын кабыл ал, мага Өзүңдүн мыйзамыңды үйрөт.

¹⁰⁹Менин жаным ар дайым коркунучта, бирок Сенин мыйзамыңды унутпайм.

¹¹⁰Кудайсыздар мага тор жайышты, бирок мен Сенин буйруктарыңдан четтеген жокмун.

¹¹¹Сенин осуяттарыңды түбөлүк мурас катары кабыл алдым, анткени алар – менин жүрөгүмдүн кубанычы.

¹¹²Мен жүрөгүмдү Сенин буйруктарыңды дайыма, өмүрүмдүн акырына чейин аткарууга бурдум.

¹¹³Жаман ойлуу адамдарды жек көрөм, ал эми Сенин мыйзамыңды сүйөм.

¹¹⁴Сен менин баш калкалар жайымсың, калканымсың. Сенин сөзүңө таянам.

¹¹⁵Мыйзамсыздар, мага жолобогула, мен өзүмдүн Кудайымдын осуяттарын аткарам.

¹¹⁶Жашашым үчүн, мага Өз сөзүң боюнча күч бер. Үмүттөнгөнүм үчүн, мени уятка калтырба.

¹¹⁷Мени колдо, ошондо мен куткарылам. Сенин мыйзамдарыңа дайыма көңүл коём.

¹¹⁸Мыйзамдарыңдан четтегендердин баарын Сен кулатасың, анткени алардын куулугунан эч нерсе чыкпайт.

¹¹⁹Жер үстүндөгү кудайсыз адамдардын баарын Сен күлдөй сапырасың, ошондуктан мен Сенин осуяттарыңды сүйөм.

¹²⁰Сенин коркунучуңдан денем титирейт, мен Сенин жазаларыңдан корком.

¹²¹Мен баарын адилеттик жана чындык боюнча кылдым, мени куугунтуктоочуларымдын колуна салып бербе.

¹²²Өз кулуңа болуш, текеберлер эзбесин.

¹²³Сенин куткарууңду жана акыйкат сөздөрүңдү күтө берип көзүм талыды.

¹²⁴Өз кулуңа Өз ырайымың боюнча ырайым кыл, мага Өз мыйзамдарыңды үйрөт.

¹²⁵Мен Сенин кулуңмун, мага акыл бер, ошондо мен Сенин осуяттарыңды түшүнөм.

¹²⁶Теңирдин чара көрө турган убакыты келди, анткени Сенин мыйзамыңды бузушту.

¹²⁷Мен болсо Сенин осуяттарыңды алтындан да, таза алтындан да жакшы көрөм.

¹²⁸Сенин буйруктарыңдын баарын адилеттүү деп эсептейм, жалган жолдорду жек көрөм.

¹²⁹Сенин осуяттарың кереметтүү, ошондуктан алар менин жүрөгүмдө сакталуу.

¹³⁰Сенин сөздөрүңдөн алган ачылыш көздү ачат, жөнөкөйлөргө акыл берет.

¹³¹Мен оозумду ачып акактап жатам, анткени Сенин осуяттарыңды эңсеп турам.

¹³²Ысымыңды сүйгөндөргө кандай назар салып, ырайым кылсаң, мага да ошондой кыл.

¹³³Буттарымды Сенин сөздөрүң менен жүргүдөй кылып бекемде, эч бир мыйзамсыз иштин мени бийлеп алуусуна жол бербе.

¹³⁴Мени адамдын эзүүсүнөн куткар, ошондо Сенин буйруктарыңды аткарам.

¹³⁵Өз кулуңду Өз жүзүң менен жарык кыл, мага Өзүңдүн мыйзамдарыңды үйрөт.

¹³⁶Сенин мыйзамыңды сактабай жатышкандыктан, көзүмдүн жашы көл болду.

¹³⁷Сен адилетсиң, Теңирим, Сенин мыйзамдарың да адилет.

¹³⁸Осуят кылган көрсөтмөлөрүң адилет, туптуура.

¹³⁹Мени кызганыч жеп жатат, анткени менин душмандарым Сенин сөздөрүңдү унутуп коюшту.

¹⁴⁰Сенин сөзүң абдан таза, Сенин кулуң аны сүйөт.

¹⁴¹Мен кичинекей, жек көрүндү адаммын, бирок Сенин буйруктарыңды унуткан жокмун.

¹⁴²Сенин адилеттигиң түбөлүктүү, Сенин мыйзамың – чындык.

¹⁴³Башыма кыйынчылык түшүп, азап тартып жатам, бирок Сенин осуяттарың – менин сооронучум.

¹⁴⁴Сенин көрсөтмөлөрүң түбөлүккө адилеттүү. Мени акылыма келтир, ошондо мен жашайм.

¹⁴⁵Сени чын жүрөгүмдөн чакырам, Теңирим, мени ук, ошондо мен Сенин мыйзамдарыңды сактайм.

¹⁴⁶Сени чакырам, мени куткар, ошондо Сенин осуяттарыңды сактайм.

¹⁴⁷Таң заардан Сени чакырам. Сенин сөзүңө таянам.

¹⁴⁸Сенин сөзүңдү терең түшүнүш үчүн, түнү менен кирпик какпай чыгам.

¹⁴⁹Өзүңдүн ырайымың боюнча менин үнүмдү ук, Теңирим. Өз адилеттигиң боюнча мени тирилт.

¹⁵⁰Жамандык ойлогондор мага жакындап калышты, алар Сенин мыйзамыңдан алыс.

¹⁵¹Сен жакынсың, Теңирим, Сенин осуяттарыңдын баары – чындык.

¹⁵²Өзүңдүн осуяттарыңды түбөлүккө орнотконуңду мен мурунтан эле билем.

¹⁵³Менин азап тартып жатканыма назарыңды салып, мени куткар, анткени мен Сенин мыйзамыңды унуткан жокмун.

¹⁵⁴Менин ишиме киришип, мени корго. Мени Өз сөзүң боюнча тирилт.

¹⁵⁵Куткарылуу кудайсыздардан алыс, анткени алар Сенин мыйзамдарыңды издешпейт.

¹⁵⁶Сенин боорукердигиң чексиз, Теңирим. Мени Өз адилеттигиң боюнча тирилт.

¹⁵⁷Мени куугунтуктагандар, душмандарым көп, бирок мен Сенин осуяттарыңдан четтеген жокмун.

¹⁵⁸Сенин сөзүңдөн четтегендерди көрүп капа болом, анткени алар Сенин сөзүңдү сакташкан жок.

¹⁵⁹Сенин буйруктарыңды кандай сүйөрүмдү көр. Өзүңдүн ырайымың боюнча мени тирилт.

¹⁶⁰Сенин сөзүңдүн негизи – чындык, Сенин ар бир адилет өкүмүң түбөлүктүү.

¹⁶¹Төрөлөр мени себепсиз куугунтуктап жатышат, бирок менин жүрөгүм Сенин сөзүңдөн коркот.

¹⁶²Өтө чоң олжого ээ болгондой, Сенин сөзүңө кубанам.

¹⁶³Жалганчылыкты жек көрөм, андан жийиркенем, Сенин мыйзамыңды болсо сүйөм.

¹⁶⁴Адилет өкүмдөрүң үчүн Сени бир күндө жети жолу даңктайм.

¹⁶⁵Сенин мыйзамыңды сүйгөндөрдүн тынчтыгы зор, аларга бөгөт жок.

¹⁶⁶Сенин жардамыңа таянам, Теңирим, Сенин осуяттарыңды аткарам.

¹⁶⁷Сенин осуяттарың менин жүрөгүмдө сакталуу, мен аларды абдан сүйөм.

¹⁶⁸Сенин буйруктарың менен осуяттарыңды аткарам, анткени менин бардык жолум Сенин алдыңда.

¹⁶⁹Менин зар-муңум Сага жетсин, Теңирим. Өз сөзүң боюнча мага акыл бер.

¹⁷⁰Менин жалынуум Сенин алдыңа келсин. Өзүңдүн сөзүң боюнча мени куткар.

¹⁷¹Сен мага Өзүңдүн мыйзамдарыңды үйрөткөндө, менин оозумдан Сени мактаган сөздөр чыгат.

¹⁷²Менин тилим Сенин сөзүңдү жарыя кылат, анткени Сенин осуяттарыңдын баары адилет.

¹⁷³Сенин колуң мага жардам берүүгө даяр болсун, анткени мен Сенин буйруктарыңды тандап алдым.

¹⁷⁴Сенин жардамыңды зарыгып күтүп жатам, Теңирим, Сенин мыйзамың – менин сооронучум.

¹⁷⁵Менин жаным жашасын, Сени даңктасын, Сенин адилеттигиң мага жардам берсин.

¹⁷⁶Мен жоголгон койдой адашып калдым. Өз кулуңду издеп тап, анткени мен Сенин осуяттарыңды унуткан жокмун.