Read Кыргыз тилиндеги Библия, 2004 Забур 131 Bible Online

Забур 131 - Кыргыз тилиндеги Библия, 2004 bible

Забур 131

¹Табынуу үчүн бара жаткандагы ыр. Теңир, Дөөттү эсте, анын бардык азап-кайгысын эсте.

²Анын Теңирге кандай ант бергенин, Жакыптын Күчтүүсүнө кандай убада бергенин эсте:

³«Теңирге жай тапмайынча, Жакыптын Күчтүүсүнө турак-жай тапмайынча,

⁴үйүмө кирбейм, төшөгүмө жатпайм,

⁵көз ирмебейм, кирпик какпайм».

⁶Биз ал жөнүндө Эфратадан уктук, биз аны Жейарим талааларынан таптык.

⁷Анын турак-жайына баралы, Анын бут алдына жыгылып таазим кылалы.

⁸Теңир, Өзүңдүн бейпил жайыңа кудуретиңди көрсөткөн келишим сандыгың менен кел.

⁹Сенин ыйык кызмат кылуучуларың адилеттикти кийишет, Сенин ыйыктарың кубанышат.

¹⁰Өз кулуң Дөөт үчүн Өзүңдүн майланганыңдан жүз бурба.

¹¹Теңир Дөөткө: «Сенин тактыңа өз тукумуңдан отургузам.

¹²Эгерде сенин уулдарың Менин келишимимди жана аларга үйрөтө турган мыйзамдарымды сакташса, анда алардын уулдары да түбөлүккө сенин тактыңда отурушат», – деп ант берген, аны таптакыр бузбайт.

¹³Анткени Теңир Сионду тандап алды, аны Өзүнө турак жай кылууну каалады.

¹⁴«Бул Менин бейпил жайым, ушул жерге жайгашам, анткени Мен ушул жерди кааладым.

¹⁵Анын тамагына батамды мол берем, анын жакырларын нанга тойгузам.

¹⁶Анын ыйык кызмат кылуучуларына куткарылуу кийгизем, анын ыйыктары кубанышат.

¹⁷Ал жерде Дөөттүн мүйүзүн кайрадан көтөрөм, Өзүмдүн майланганыма чырактан даярдадым.

¹⁸Душмандарын уятка калтырам, ал эми анын башындагы таажысы жаркырап турат».