Read Кыргыз тилиндеги Библия, 2004 Забур 134 Bible Online

Забур 134 - Кыргыз тилиндеги Библия, 2004 bible

Забур 134

¹Теңирди даңктагыла. Теңирдин үйүндө, Кудайыбыздын үйүнүн короосунда турган Теңирдин кулдары,

²Теңирдин ысымын мактагыла, мактагыла.

³Теңирди мактагыла, анткени Теңир жакшы. Анын ысымын мактап ырдагыла, анткени бул жагымдуу.

⁴Анткени Теңир Өзүнө Жакыпты тандап алды, Ысрайылды Өзүнө менчик эл кылып тандап алды.

⁵Мен Теңирдин улуу экенин, биздин Кудай-Теңирибиз бардык кудайлардан жогору экенин таанып билдим.

⁶Теңир асманда, жерде, деңизде, бардык түпкүрдө эмне кааласа, ошонун баарын жасайт.

⁷Жер кыйырынан булуттарды көтөрөт, жамгыр жаадырып, чагылганды жаратат, Өзүнүн сактоочу жайларынан шамал чыгарат.

⁸Ал мисирликтердин тунгучтарын, малынын төл башыларын кырып салган.

⁹Мисир, сенин ичиңде, фараонго жана анын бардык кулдарына каршы жышаандары менен кереметтерин көрсөткөн.

¹⁰Ал көптөгөн күчтүү падышаларды:

¹¹Амор падышасы Сихонду, Башан падышасы Огду, Канаандын бардык падышачылыктарын жок кылган.

¹²Алардын жерлерин мураска, Өз эли Ысрайылга мураска берген.

¹³Теңирим! Сенин ысымың түбөлүктүү. Теңирим! Сен муундан муунга унутулбайсың.

¹⁴Анткени Теңир Өз элине болушат, Өзүнүн кулдарына ырайым кылат.

¹⁵Бутпарас элдердин жасалма кудайлары – күмүш жана алтын, адамдын колу менен жасалган нерселер.

¹⁶Алардын ооздору бар, бирок сүйлөбөйт; көздөрү бар, бирок көрбөйт.

¹⁷Алардын кулактары бар, бирок укпайт; алардын ооздорунан дем чыкпайт.

¹⁸Аларды жасагандар, алардан үмүт кылгандар ошолорго окшоп калышат.

¹⁹Ысрайыл тукуму! Теңирди даңкта! Арун тукуму! Теңирди даңкта!

²⁰Леби тукуму! Теңирди даңкта! Теңирден корккондор! Теңирди даңктагыла!

²¹Сиондо, Иерусалимде жашаган Теңирге алкыш! Теңирди даңктагыла!