Read Кыргыз тилиндеги Библия, 2004 Забур 138 Bible Online

Забур 138 - Кыргыз тилиндеги Библия, 2004 bible

Забур 138

¹Ырчылар тобунун башчысына. Дөөттүн забуру. Теңир! Сен мени сынадың, баарын билесиң.

²Сен менин качан отуруп, качан турарымды билесиң; Сен менин ойлорумду алыстан эле билесиң.

³Басып бара жатсам да, эс алып жатсам да, Сен мени курчап турасың, Сага менин бардык жолдорум белгилүү.

⁴Мен айта электе эле, Сен, Теңирим, айтар сөзүмдү толугу менен билесиң.

⁵Мени артымдан да, алдымдан да курчап турасың, менин үстүмө Өзүңдүн колуңду коёсуң.

⁶Бул билим мен үчүн таң каларлык, аны түшүнүү – мен үчүн кол жеткис бийиктик.

⁷Сенин Рухуңдан качып кайда барам, Сенин жүзүңдөн кайда качам?

⁸Асманга чыксам да, Сен ошол жердесиң; өлгөндөр жаткан жайга түшсөм да, Сен ошол жердесиң.

⁹Таңдын канатын алып, деңиздин кыйырына көчүп кетсем да,

¹⁰ошол жерде мени Сенин колуң жетелейт, мени Сенин оң колуң кармап турат.

¹¹Эгерде мен: «Мүмкүн, мени караңгылык жашырып калар, менин тегерегимдеги жарык караңгы болуп калар», – десем да,

¹²караңгылык мени Сенден жашыра албайт, түн да күндөй жарык: жарык кандай болсо, караңгы да ошондой.

¹³Анткени менин ички мүчөлөрүмдү Сен жараткансың, Сен мени энемдин ичинде токугансың.

¹⁴Мен Сени даңктайм, анткени мен таң каларлык жаратылгам. Сенин иштериң керемет, аны менин жаным толук түшүнөт.

¹⁵Мен жашыруун жаратылып жатканда, курсактын тереңинде пайда болуп жатканда, менин сөөктөрүм Сенден жашыруун эмес болчу.

¹⁶Мен жаңыдан түйүлдүк боло баштаганда эле, Сен мени көргөнсүң. Мен төрөлө электе эле, мага белгиленген күндөрдүн бири да боло электе эле Сенин китебиңде баары жазылып коюлган.

¹⁷Кудайым, Сенин ойлоруң мен үчүн кандай баалуу, алардын саны кандай көп!

¹⁸Мен аларды санай турган болсом, алар кумдан да көп. Мен ойгонгондо да, Сени мененмин.

¹⁹Оо Кудайым, кудайсызды жок кылсаң кана! Кан ичкичтер, менден алыс кеткиле!

²⁰Алар Сага каршы жаман сөздөрдү сүйлөп жатышат. Душмандарың Сенин ысымыңды куру бекер эле атап жатышат.

²¹Теңирим, Сени жек көргөндөрдү мен кантип жек көрбөйм, Сага каршы чыккандардан мен кантип жийиркенбейм?

²²Аларды аябай жек көрөм, алар – мага душман.

²³Кудайым, мени сынап, жүрөгүмдү бил; мени сынап, ойлорумду бил.

²⁴Кара, мен коркунучтуу жолдо эмесминби, мени түбөлүктүү жолдо жетектеп жүр.