Read Кыргыз тилиндеги Библия, 2004 Забур 139 Bible Online

Забур 139 - Кыргыз тилиндеги Библия, 2004 bible

Забур 139

¹Ырчылар тобунун башчысына. Дөөттүн забуру.

²Оо Теңир, мени жаман адамдан куткар, мени кысымга алган адамдан сакта.

³Алар жүрөгүндө жамандык ойлоп, күн сайын согушууга даяр турушат.

⁴Тилдерин жыландай соймоңдотушат, ооздорунда жыландын уусу бар.

⁵Оо Теңир, мени кудайсыздын колунан сакта, кысымга алган адамдан сакта, алар мени жыкканы жатышат.

⁶Текеберлер мага жашыруун тузак тартып, сыйыртмак салышты, жолума тор жайышты, капкан коюшту.

⁷Мен Теңирге мындай дедим: «Сен менин Кудайымсың. Менин жалынган үнүмдү ук, Теңирим!»

⁸Теңир, Теңир, менин куткаруучу күчүм! Согушта Сен башымды калкаладың.

⁹Теңир, текеберленбеши үчүн, кудайсыздарды тилегине жеткирбе, алардын жаман ойлорун ишке ашырба.

¹⁰Мени курчагандардын ооздорунан чыккан жамандык өз баштарына тийсин.

¹¹Аларга чок жаасын. Алар отко ыргытылсын, турбас болуп туңгуюкка ыргытылсын.

¹²Тили заар адам жер үстүндө тамыр жайбасын, кысым кылгандын кыянаттыгы өзүн өлүмгө тартып кетсин.

¹³Теңир эзилгендерге адил өкүм чыгарарын, жардыларга адилеттик кыларын билем.

¹⁴Адил адамдар Сенин ысымыңды даңкташат, адилет адамдар Сенин алдыңда жашашат.