Read Кыргыз тилиндеги Библия, 2004 Забур 142 Bible Online

Забур 142 - Кыргыз тилиндеги Библия, 2004 bible

Забур 142

¹Дөөттүн забуру. Теңир! Менин сыйынуумду ук, Өз ишенимдүүлүгүң боюнча менин жалынуума кулак сал, мага Өз адилеттигиң менен жооп бер.

²Өз кулуң менен соттошпо, анткени Сенин алдыңда бир да тирүү жан актала албайт.

³Душман мени аңдып жүрөт, өмүрүмдү жерге тепсеп, небак өлгөн кишидей караңгылыкта жашоого мажбур кылды.

⁴Ошондо ындыным өчүп калды, жүрөгүм сенейип катып калды.

⁵Байыркы күндөрдү эстеп, Сенин бардык иштериң жөнүндө ойлоном, колуңдун иштери жөнүндө ой жүгүртөм.

⁶Сага колумду сунам; сууга чаңкаган жердей болуп, жаным Сага тартылат.

⁷Мени тезирээк ук, Теңирим, рухум алсырап бара жатат. Менден жүзүңдү жашырба, көрдө жаткандарга окшоп калбайын.

⁸Сенин ырайымыңды эртерээк угайын, анткени мен Сага таянам. Мага жүрө турган жолумду көрсөт, анткени жанымды Сенин алдыңа алып келем.

⁹Теңирим, мени душмандарымдан куткар, Сага корголойм.

¹⁰Мага Өзүңдүн эркиңди аткарууну үйрөт, анткени Сен менин Кудайымсың. Сенин жакшы Рухуң мени чындык өкүм сүргөн жерге алып барсын.

¹¹Теңирим, мени Өз ысымың үчүн тирилт, Өз чындыгың үчүн жанымды мүшкүлдөн куткар.

¹²Өз ырайымың менен душмандарымды жок кыл, жанымды жабыр тарттыргандардын баарын жок кыл, анткени мен Сенин кулуңмун.