Read Кыргыз тилиндеги Библия, 2004 Забур 144 Bible Online

Забур 144 - Кыргыз тилиндеги Библия, 2004 bible

Забур 144

¹Дөөттүн даңктоосу. Өзүңдү даңазалайм, Теңирим, Кудайым, Падышам, Сенин ысымыңды түбөлүк даңктайм.

²Сени күн сайын даңктайм, Сенин ысымыңды түбөлүк мактайм.

³Теңир улуу жана мактоого татыктуу, Анын улуулугу акыл жеткис.

⁴Бир муун бир муунга Сенин иштериңди мактайт, Сенин күчүңдү жарыя кылат.

⁵Ал эми мен Сенин улуулугуң, улуу даңкың жана кереметтүү иштериң жөнүндө жар салам.

⁶Сенин коркунучтуу иштериңдин күчү жөнүндө айтышат, Сенин улуулугуң жөнүндө болсо мен жарыя кылам.

⁷Сенин кең пейилдигиңди унутпай жар салышат, Сенин адилеттигиңди даңктап ырдашат.

⁸Теңир кайрымдуу жана ырайымдуу, чыдамдуу жана абдан боорукер.

⁹Теңир бардык адамдарга жакшылык кылат, Өзү жараткандарынын бардыгына кайрымдуулук кылат.

¹⁰Теңирим, Сени Өзүңдүн бардык иштериң даңктасын, Сени Өзүңдүн ыйыктарың даңкташсын.

¹¹Сенин падышачылыгыңдын даңкы жөнүндө жар салышсын, Сенин күчүң жөнүндө айтышсын.

¹²Адам баласы Сенин күчүңдү жана Сенин падышачылыгыңдын улуу даңкын билсин.

¹³Сенин падышачылыгың – түбөлүк падышачылык, Сенин бийлигиң муундан муунга.

¹⁴Теңир жыгылып бараткандарды сүйөйт, кулагандардын баарын тургузат.

¹⁵Бардыгы Сени карап, күтүп турушат; Сен аларга тамакты өз маалында бересиң.

¹⁶Колуңду ачып, кең пейилдигиң менен бардык тирүү жандарды тойгузасың.

¹⁷Теңир Өзүнүн бардык жолунда адилет, Өзүнүн бардык ишинде ишенимдүү.

¹⁸Теңир Өзүн чакыргандардын бардыгына жакын, Өзүн чын жүрөктөн чакыргандардын бардыгына жакын.

¹⁹Ал Өзүнөн корккондордун каалоосун аткарат, алардын зар-муңун угат, аларга жардам берет.

²⁰Теңир Өзүн сүйгөндөрдүн баарын сактайт, ал эми кудайсыздардын баарын кырып жок кылат.

²¹Менин оозум Теңирди мактайт. Ар бир тирүү жан Анын ыйык ысымын түбөлүк даңктасын.