Read Кыргыз тилиндеги Библия, 2004 Забур 148 Bible Online

Забур 148 - Кыргыз тилиндеги Библия, 2004 bible

Забур 148

¹Теңирди даңктагыла. Теңирди асманда мактагыла, Аны бийикте мактагыла.

²Анын бардык периштелери, Аны мактагыла; Анын бардык кошуундары, Аны мактагыла.

³Күн менен ай, Аны мактагыла; жаркыраган бардык жылдыздар, Аны мактагыла.

⁴Асмандын асманы, асмандан жогору турган суулар, Аны мактагыла.

⁵Бардыгы Теңирдин ысымын макташсын, анткени Ал буйруганда, бардыгы жаралган.

⁶Аларды түбөлүккө койгон, эч качан бузулбай турган мыйзам берген.

⁷Жердегилер, зор балыктар, бардык туңгуюктар, Теңирди мактагыла.

⁸От жана мөндүр, кар жана туман, Анын сөзүн аткарган бороон,

⁹тоолор жана бардык адырлар, мөмөлүү дарактар жана бардык кедрлер,

¹⁰жырткычтар жана ар кандай мал, сойлоочулар жана канаттуу куштар,

¹¹жер үстүндөгү падышалар жана бардык элдер, төрөлөр жана жер жүзүндөгү бардык башкаруучулар,

¹²жигиттер жана кыздар, карылар жана жаштар

¹³Теңирдин ысымын макташсын, анткени жалгыз Анын ысымы жогору, Анын даңкы асман менен жерден жогору.

¹⁴Ал Өз элинин мүйүзүн жогору көтөрдү, бардык ыйыктарынын, Ысрайыл уулдарынын, Өзүнө жакын турган элинин даңкын чыгарды. Теңирди даңктагыла!