Read Кыргыз тилиндеги Библия, 2004 Забур 15 Bible Online

Забур 15 - Кыргыз тилиндеги Библия, 2004 bible

Забур 15

¹Дөөттүн ыры. Кудай, мени сактай көр, анткени Өзүңө таянам.

²Мен Теңирге мындай дедим: «Сен менин Теңиримсиң. Сага менин тартууларымдын кереги жок.

³Мен Сенин жер үстүндөгү ыйыктарыңа, атактууларыңа тартылам».

⁴Бөлөк кудайга кайрылгандардын кайгысы көбөйсүн. Мен алардын кандуу курмандыктарын чалбайм, алардын ысымдарын оозума албайм.

⁵Теңир менин үлүшүм, менин мурасым. Тагдырым Сенин колуңда.

⁶Мага жакшы үлүш тийди, мурасым өзүмө жагат.

⁷Мага кеңеш берген Теңиримди даңктайм. Атүгүл, түнкүсүн да жүрөгүм мага акыл үйрөтүп турат.

⁸Теңирди мен өзүмдүн алдымдан ар дайым көрүп турдум, Ал менин оң жагымда, мен олку-солку болбойм.

⁹Ошондуктан жүрөгүм кубанычка толуп, тилим шаттуу сүйлөп жатат. Атүгүл, денем да тынч алды.

¹⁰Анткени Сен менин жанымды өлгөндөр жаткан жайда калтырбайсың, Өз ыйыгыңдын чирүүсүнө жол бербейсиң.

¹¹Сен мага өмүр жолун көрсөтөсүң. Сенин алдыңда – толук кубаныч, оң колуңда – түбөлүк жыргал.