Read Кыргыз тилиндеги Библия, 2004 Забур 16 Bible Online

Забур 16 - Кыргыз тилиндеги Библия, 2004 bible

Забур 16

¹Дөөттүн сыйынуусу. Теңир, чындыкты ук да, зар-муңума кулак сал, калп айтпагандын оозунан чыккан жалынууга кулак төшө.

²Мага өкүмдү Сен чыгар, Сенин көздөрүң чындыкты көрсө экен.

³Сен менин жүрөгүмдү сынадың, мага түн ичинде келдиң, мени сынадың, бирок эч нерсе тапкан жоксуң. Оозум ойлорумдан четтеген жок.

⁴Бардык иш-аракетте Сенин сөзүң боюнча өзүмдү сактап, эзүүчүнүн жолун жолдогон жокмун.

⁵Менин кадамдарымды Өз жолдоруңда бекемде, буттарым оңго да, солго да бурулбасын.

⁶Мен Сени чакырып жатам, анткени Сен мени угасың, Кудайым. Мага кулак сал, сөзүмдү ук.

⁷Өзүңө таянгандарды Өзүңдүн оң колуңа каршы чыккандардан куткарган Кудай, Өзүңдүн кереметтүү ырайымыңды көрсөт.

⁸Мени көзүңдүн карегиндей сактай көр, канатыңдын астына калкалай көр.

⁹Мага кол салган кудайсыздардан, курчаган кас душмандарымдан калкала.

¹⁰Алардын жүрөгүн май басты, тилдери менен менменсинип сүйлөшөт.

¹¹Азыр алар бизди кадам сайын курчашат; жерге кулатыш үчүн, алар бизден көзүн албайт.

¹²Алар жем издеген арстанга, жашыруун буктурмада отурган жырткычка окшош.

¹³Теңир, ордуңан тур, аларды тый, кыйрат, жанымды кудайсыздан Өз кылычың менен куткар.

¹⁴Теңир, мени бул адамдардан – бул дүйнөдө гана үлүшү бар, курсагын Сенин казыналарыңдан тойгузуп жүргөн бул дүйнөнүн адамдарынан Өз колуң менен куткара көр. Алардын уулдары ток, артканын өз балдарына калтырышат.

¹⁵Ал эми мен адилдигим менен Сенин жүзүңдү карайм. Ойгонгондо, Сенин бейнеңди көрүп, көзүм тоёт.