Read Кыргыз тилиндеги Библия, 2004 Забур 17 Bible Online

Забур 17 - Кыргыз тилиндеги Библия, 2004 bible

Забур 17

¹Ырчылар тобунун башчысына. Теңир бардык душмандардын жана Шабулдун колунан куткарып алганда, Теңирдин кулу Дөөттүн Теңирге ырдаган ыры. Ошондо ал мындай деди:

²«Сени сүйөм, Теңирим, күч-кубатым менин!

³Теңир менин тирегим, баш паанам, куткаруучум; Кудайым менин аска-зоом. Мен Ага гана таянам. Ал менин калканым, куткаруучу мүйүзүм, таянычым».

⁴Табынууга татыктуу Теңирдин атын чакырып, душмандарымдан кутулам.

⁵Мени өлүм азаптары курчап алды, кыйынчылыктардын агымы үрөйүмдү учурду.

⁶Мага өлгөндөр жаткан жайдын чынжырлары салынды, өлүмдүн торуна чалындым.

⁷Мен кысталышта калганда, Теңиримди чакырдым, Кудайыма жалындым. Ал Өз турагынан менин үнүмдү укту, зар-муңум Анын кулагына жетти.

⁸Жер силкинип термелди, тоолордун негиздери ордунан козголду, анткени Кудай каарданды.

⁹Анын каарынан түтүн көтөрүлүп, оозунан баарын жалмай турган от чыкты, Андан күйүп жаткан чоктор чачырап жатты.

¹⁰Асманды эңкейтип, Ал жерге түштү, Анын бут астында караңгылык жатты.

¹¹Ал керуптардын үстүнө отуруп, шамалдын канатында учуп жөнөдү.

¹²Караңгылыкты Өзүнө жабуу кылды, асмандагы булуттарды, кара булуттарды Өзүнүн тегерегине чатыр кылды.

¹³Анын алдындагы жарыктан Анын булуттары, мөндүр, кызыл чоктор качты.

¹⁴Асманда Теңир күркүрөдү, Бардыгынан Жогору Турган үн салды, мөндүр жана жалындаган чок жаады.

¹⁵Өзүнүн жебелерин тартып, аларды туш-тушка чачыратты; көп чагылган жиберип, аларды туш-тушка качырды.

¹⁶Теңирим, Сенин каардуу үнүңдөн, Сенин каарыңдын илебинен суу башаттары, ааламдын негизи ачылды.

¹⁷Ал асмандан колун сунуп, мени алды, мени чоң суулардан тартып чыгарды.

¹⁸Мени күчтүү душманымдан, менден күчтүү болгон жек көрүүчүлөрдөн куткарды.

¹⁹Алар мага башыма мүшкүл түшкөн күнү каршы чыгышты. Бирок Теңир мага жөлөк болду.

²⁰Ал мени кең жерге алып чыкты, мени куткарды, анткени Ал мени жакшы көрөт.

²¹Теңир менин адилдигиме жараша, колумдун тазалагына жараша тиешемди берди.

²²Анткени мен Теңирдин жолун сактадым, Кудайымдан четтеген эмесмин.

²³Анткени Анын бардык мыйзамдары менин алдымда, Анын көрсөтмөлөрүнөн четтеген жокмун.

²⁴Мен Кудай алдында таза элем, күнөө кылып албайын деп сактанчумун.

²⁵Теңир Өзүнүн көз алдындагы адилдигиме жараша, колумдун тазалыгына жараша тиешемди берди.

²⁶Боорукерге Сен боорукердик кыласың, адил адамга адилет мамиле кыласың.

²⁷Тазаларга тазалыгына жараша мамиле кыласың, алдамчыга алдамчылыгына жараша мамиле кыласың.

²⁸Анткени Сен эзилген адамдарды куткарасың, ал эми менменсинип карагандарды кемсинтесиң.

²⁹Теңир, Сен менин шамымды күйгүзөсүң. Кудайым караңгымды жарык кылат.

³⁰Мен Сени менен аскерлерди талкалайм, Кудайым менен чепти ашып түшөм.

³¹Кудай! Анын жолу таза, Теңирдин сөзү таза. Ал – Өзүнө таянгандардын баарына калкан.

³²Теңирден башка Кудай барбы? Биздин Кудайдан башка Сактоочу барбы?

³³Кудай мага күч берет, мага түз жол салат.

³⁴Буттарымды бугунун буттарындай кылат, мени бийик жерлериме чыгарат.

³⁵Колумду согушка даярдайт, ошон үчүн колдорум жез жааны сындырат.

³⁶Сен мага куткаруучу калканыңды бердиң, Сенин оң колуң мени колдоп турат, Сенин ырайымың мени жогору көтөрөт.

³⁷Сен менин баса турган жолумду кеңейтесиң, ошондо тизелерим титиребейт.

³⁸Душмандарымды кууп жетип, аларды жок кылмайынча, артка кайтпайм.

³⁹Аларды талкалайм, алар тура албай калышат, менин бут алдыма жыгылышат.

⁴⁰Анткени Сен мага согушканга күч бердиң, мага каршы көтөрүлгөндөрдү бут алдыма жыгып бердиң.

⁴¹Душмандарымды менин көз алдымда артка чегинттиң. Мени жек көргөндөрдү кыйратып жатам.

⁴²Алар боздоп жатышат, бирок алардын куткарары жок. Теңирге жалынып жатышат, бирок Ал аларды укпайт.

⁴³Аларды топурактай сапырып, көчөдөгү балчыктай тебеледим.

⁴⁴Сен мени эл козголоңунан куткарып алып, бөтөн элдерге эл башчы кылдың. Өзүм тааныбаган эл мага кызмат кылып жатат.

⁴⁵Алар мен жөнүндө угуп эле, мага баш ийишет. Бөтөн элдер менин алдымда жасакерленишет.

⁴⁶Бөтөн элдер кумсарып, өздөрүнүн сепилдеринде титиреп отурушат.

⁴⁷Теңир тирүү, менин тирегим даңкталсын! Мени куткарган Кудай даңазалансын!

⁴⁸Мен үчүн өч алган, бөтөн элдерди багындырып берген Кудай,

⁴⁹мени душмандарымдан куткарган Кудай даңкталсын! Мага каршы чыккандардын алдында Сен мени жогору көтөрдүң, мени катаал кишиден куткардың.

⁵⁰Ошон үчүн, Теңир, Сени даңктайм, бөтөн элдердин арасында Сенин ысымыңды даңктап ырдайм.

⁵¹Падышаны улуу жеңиш менен куткарган, Өзүң майлаган Дөөткө жана анын укум-тукумуна түбөлүккө ырайым кылган Сени даңктап ырдайм.