Read Кыргыз тилиндеги Библия, 2004 Забур 20 Bible Online

Забур 20 - Кыргыз тилиндеги Библия, 2004 bible

Забур 20

¹Ырчылар тобунун башчысына. Дөөттүн забуру.

²Теңир, падыша Сенин күчүң менен шаттанат, Сенин куткарганыңа чексиз кубанат.

³Сен ага жүрөгү каалаганды бердиң, анын оозунан чыккан өтүнүчтү четке каккан жоксуң.

⁴Анткени Сен ага ырайымың менен батаңды бердиң, башына таза алтындан таажы кийгиздиң.

⁵Ал Сенден өмүр сурады, Сен ага узун өмүр бердиң.

⁶Сен аны куткаргандыктан, ал даңкка бөлөндү. Урмат менен улуулукту Сен ага таажы кылып кийгиздиң.

⁷Сен ага түбөлүк батаңды берип, Өзүңдүн кубанычың менен анын көңүлүн көтөрдүң.

⁸Анткени падыша Теңирге таянат, ал Бардыгынан Жогору Тургандын ырайымы менен бекем турат.

⁹Сенин колуң бардык душмандарыңды талкалайт, оң колуң Сени жек көргөндөрдү кыйратат.

¹⁰Каарың кайнаганда, Сен аларды күйүп жаткан мештей кыласың. Теңир каарданганда, аларды кыйратат, аларды от өрттөп кетет.

¹¹Сен алардын тукумун жер бетинен, уругун адам баласынын арасынан жок кыласың.

¹²Анткени алар Сага жамандык кылабыз деп чечим чыгарышты, бирок ишке ашыра алышкан жок.

¹³Сен аларды бута кылып коёсуң, Өзүңдүн жааңдын жебелери менен аларды бетке атасың.

¹⁴Теңир, Өзүңдүн күчүң менен көкөлө! Биз Сенин кудуретиңди даңктап ырдайбыз.