Read Кыргыз тилиндеги Библия, 2004 Забур 21 Bible Online

Забур 21 - Кыргыз тилиндеги Библия, 2004 bible

Забур 21

¹Ырчылар тобунун башчысына. Таң атарда ырдоо үчүн. Дөөттүн забуру.

²Кудайым! Кудайым! Сен мени эмнеге таштап койдуң? Менин куткаруу сурап боздогон үнүм Сага жетпей жатат.

³Кудайым! Күндүз жалынсам да, Сенден мага жооп жок, түндө жалынсам да тынчтана албайм.

⁴Бирок Сен, Ыйык, Ысрайылдын даңктоо ырларынын арасында жашайсың.

⁵Биздин ата-бабаларыбыз Сага таянышкан, алар Сага таянышкандыктан, Сен аларды куткарып тургансың.

⁶Алар Сени чакырышкан, ошон үчүн куткарылышкан. Алар Сага таянышкан, ошон үчүн уятка калышкан эмес.

⁷Мен болсо адам эмес эле, курт болуп калдым. Адамдарга шылдың, элдерге жек көрүндү болдум.

⁸Мени карап тургандар баштарын чайкап, мындай деп шылдыңдап жатышат:

⁹«Ал Теңирге таянчу, Теңир аны куткарып алсын. Эгер ал Теңирге жакса, анда аны куткарып алсын».

¹⁰Бирок Сен мени энемдин курсагынан чыгаргансың, эмчектеги кезимде эле Өзүңө таянууну үйрөткөнсүң.

¹¹Энемдин ичинде жаткандан тартып эле, Сага тапшырылганмын, энемдин ичинен чыкканда эле, Сен менин Кудайым болчусуң.

¹²Менден алыстаба, анткени кайгы жакын, анткени жардам берүүчү жок.

¹³Көп букалар мени тегеректеп алышты, Башандын семиз өгүздөрү мени курчап алышты.

¹⁴Алар мага олжосуна жулунуп айкырган арстандай ооздорун ачышты.

¹⁵Мен суудай төгүлдүм, сөөктөрүм чачырап кетти, жүрөгүм момдой эриди.

¹⁶Күч-кубатым карападай кургады, тилим таңдайыма жабышты, Сен мени өлүм топурагына түшүрдүң.

¹⁷Анткени мени дөбөттөр курчап алышты, эки жүздүүлөрдүн тобу мени тегеректеп алышты, колу-бутумду тешишти.

¹⁸Менин бардык сөөктөрүм саналгыдай. Алар болсо мени карап, тамаша кылып жатышат.

¹⁹Чапанымды өз ара бөлүп алып жатышат, кийимим үчүн өкчөмө таш ыргытып жатышат.

²⁰Бирок, Теңирим, Сен менден алыстаба. Менин күч-кубатым, мага жардам бергенге шашыл.

²¹Жанымды кылычтан, өмүрүмдү дөбөттөрдөн сактап кал.

²²Мени арстандын оозунан куткар, Сен мени уктуң. Буйволдун мүйүзүнөн куткар.

²³Сенин ысымыңды бир туугандарыма айтып даңктаймын, элдин арасында бир Өзүңдү мактаймын.

²⁴Кудайдан корккондор! Аны мактагыла. Жакыптын бүт тукуму! Аны даңкта! Ысрайылдын бүт тукуму Анын алдында коркуп турсун!

²⁵Анткени Ал азап тарткандын кайгысына назар салбай койгон жок, аны эсине албай койгон жок. Андан Өз жүзүн жашырган жок, ал Аны чакырганда, аны укту.

²⁶Чоң жыйында Сени даңктайм. Сенден корккондордун алдында Сага берген убадаларымды аткарам.

²⁷Жардылар жесин, тойсун. Теңирди издегендер Аны даңкташсын, жүрөгүңөр түбөлүк жашасын!

²⁸Теңирди эстеп, бүт жер жүзү Ага кайрылат. Бардык бутпарас элдер Сага таазим кылышат.

²⁹Анткени падышачылык Теңирдики. Ал – бардык элдердин Эгедери.

³⁰Жер жүзүндөгү бардык атактуу адамдар тойлошот жана табынышат. Топуракка айлана тургандар, өз өмүрүн сактап кала албай тургандар Ага таазим этишет.

³¹Менин тукумум Ага кызмат кылат жана түбөлүккө Теңирдики деп аталат.

³²Алар келип, Теңирдин адилеттигин, иштерин кийинки муунга жарыялашат.