Read Кыргыз тилиндеги Библия, 2004 Забур 24 Bible Online

Забур 24 - Кыргыз тилиндеги Библия, 2004 bible

Забур 24

¹Дөөттүн забуру. Теңир, жанымды Сенин алдыңа алып келем.

²Кудайым! Сага таянам, уятка калбайын, душмандарым мага үстөмдүк кылышпасын.

³Сенден үмүттөнгөндөрдүн баары уятка калышпасын. Мага себепсиз жамандык кылгандар уятка калышсын.

⁴Теңир, мага Өз жолуңду көрсөт, Өз жолуңда жүргөндү үйрөт.

⁵Мени Өз чындыгыңа багытта, үйрөт, анткени Сен мени куткарган Кудайсың. Ар күнү Сенден үмүттөнөм.

⁶Теңир, кең пейилдигиңди, кайрымдуулугуңду эсте, анткени алар түбөлүктүү.

⁷Менин жаш кезде кылган күнөөлөрүм менен кылмыштарымды эстебе. Мени Өзүңдүн кең пейилдигиң, ырайымдуулугуң боюнча эсте, Теңир!

⁸Теңир кең пейил, адилет, ошондуктан Ал күнөөкөрлөрдү түз жолго салат.

⁹Момундарды чындыкка бурат, момундарга Өз жолунда жүргөндү үйрөтөт.

¹⁰Теңирдин бардык жолдору – Анын келишими менен мыйзамын сактагандар үчүн ырайым жана чындык.

¹¹Өз ысымың үчүн, Теңир, күнөөмдү кечир, анткени менин күнөөм чоң.

¹²Теңир Өзүнөн корккон адамга кайсы жолду тандап алууну көрсөтөт.

¹³Ал жыргал турмушта жашайт, тукуму жерди мурастап алат.

¹⁴Теңирдин жашыруун сыры – Кудайдан корккондорго, Ал Өзүнүн келишимин ошолорго жарыялайт.

¹⁵Менин көздөрүм дайыма Теңирде, анткени Ал буттарымды тордон чыгарат.

¹⁶Мага назар салып, ырайым кыл, анткени мен жалгызмын, кыйналдым.

¹⁷Жүрөгүмдөгү кайгы көбөйдү, мени кыйынчылыктан куткар.

¹⁸Азап тартып кыйналып жатканыма көңүл бур, бардык күнөөмдү кечире көр.

¹⁹Менин душмандарымды кара, алар канчалык көп, алар мени ушунчалык жек көрүшөт.

²⁰Жанымды сакта, мени куткар, мен Сага таянгандыктан, эч уятка калбайм.

²¹Актыгым менен адилеттигим мени сактап келет, анткени мен Өзүңө таянам.

²²Кудайым, Ысрайылды бардык кайгысынан куткар.