Read Кыргыз тилиндеги Библия, 2004 Забур 29 Bible Online

Забур 29 - Кыргыз тилиндеги Библия, 2004 bible

Забур 29

¹Дөөттүн забуру. Үйдү ыйыктап жаткандагы ыр.

²Мени тургузганың үчүн, душмандарымдын мага үстөмдүк кылуусуна жол бербегендигиң үчүн, Сени даңазалайм, Теңирим.

³Теңирим, Кудайым! Өзүңдү чакырганымда, мени айыктырдың.

⁴Теңирим! Сен жанымды өлгөндөр жаткан жайдан алып чыктың, көргө кирбешим үчүн, мени тирилттиң.

⁵Теңирдин ыйыктары, Ага арнап ырдагыла, Анын ыйык ысымын даңктагыла.

⁶Анткени Ал көз ирмемге эле каарданат, ал эми ырайымы түбөлүк: кечинде – ый, эртең менен болсо – кубаныч.

⁷Мен бейкут жашап турганымда: «Эч качан мүдүрүлбөйм», – дегем.

⁸Теңирим, Өзүңдүн жакшы ниетиң менен тоомду бекем кылдың. Бирок жүзүңдү менден жашыргандыктан коркуп кеттим.

⁹Ошондо мен Сени чакырдым, Теңирим, Сага жалындым:

¹⁰«Көргө киргенде, менин канымдан кандай пайда? Топурак Сени даңктамак беле? Сенин чындыгыңды жарыяламак беле?

¹¹Теңирим, кулак сал, ырайым кыл! Теңирим, мага жардам берүүчү бол».

¹²Сен менин кайгымды шаттыкка айланттың, үстүмдөгү зумбалды чечип, белимди кубаныч менен курчадың.

¹³Жаным Сени даңктасын, басылбасын. Теңир, Кудайым! Мен Сени түбөлүк даңктаймын.