Read Кыргыз тилиндеги Библия, 2004 Забур 31 Bible Online

Забур 31 - Кыргыз тилиндеги Библия, 2004 bible

Забур 31

¹Дөөттүн үйрөтүүсү. Мыйзамсыз иштери кечирилип, күнөөлөрү жабылган адам бактылуу!

²Күнөөсүн Теңир мойнуна салбаган жана куулугу жок адам бактылуу!

³Мен унчукпай койгондуктан, ар күнү кыйнала берип, денем алсырап калды.

⁴Анткени менин үстүмдөгү колуң күндүр-түндүр кыйнады. Кургакчылык убагындагыдай, өң-түстөн кеттим.

⁵Бирок мен Сага күнөөмдү ачык айттым, айыбымды жашырган жокмун: «Кылмыштарымды мойнума алып, Теңирге ачык айтайын», – дедим, ошондо Сен мени күнөөмдүн айыптоосунан куткардың.

⁶Ошон үчүн ар бир адил адам өз убагында Сага сыйынсын, ошондо ага суулардын ташкыны жетпейт.

⁷Сен менин баш паанегимсиң, Сен мени кайгыдан сактайсың, куткарылуу кубанычына бөлөйсүң.

⁸«Сени акылга келтирем, кайсы жол менен жүрүшүң керек болсо, ошол жолго салам, сени башкарып жүрөм, Менин көзүм сенин үстүңдө».

⁹«Баш ийдириш үчүн жүгөн, ооздук сала турган аттай, акылсыз качырдай болбогула».

¹⁰Кудайсызга көп кайгы, ал эми Теңирге таянганды ырайым курчап турат.

¹¹Адил адамдар, Теңир менен кубангыла, көңүлүңөрдү ачкыла! Жүрөгү тазалар, шаттангыла!