Read Кыргыз тилиндеги Библия, 2004 Забур 32 Bible Online

Забур 32 - Кыргыз тилиндеги Библия, 2004 bible

Забур 32

¹Адил адамдар, Теңир менен кубангыла! Аны мактоо адилдерге жарашат.

²Теңирди гусли чертип даңктагыла, Ага он кылдуу арфа чертип ырдагыла.

³Ага арнап жаңы ыр ырдагыла, Ага кубаныч менен уккулуктуу ырдагыла.

⁴Анткени Теңирдин сөзү чындык, Анын бардык иштери туура.

⁵Ал акыйкаттык менен адилеттикти сүйөт. Жер жүзү Теңирдин ырайымына толгон.

⁶Теңирдин сөзү менен асман, деми менен бардык асман күчтөрү жаралган.

⁷Ал деңиз сууларын үймөктөй чогултту, түпсүз туңгуюктарды сактагычтарда сактады.

⁸Бүт жер жүзү Теңирден корксун. Ааламда жашагандардын баары Анын алдында титиреп турсун.

⁹Ал эмне айтса, айтканындай болду; Ал эмне буйруса, буйруганындай болду.

¹⁰Теңир бутпарастардын кеңешин бузат, элдердин ойлорун жок кылат.

¹¹Ал эми Теңирдин кеңеши түбөлүктүү; Анын жүрөгүндөгү ойлор укумдан-тукумга кетет.

¹²Теңир кайсы элдин Кудайы болсо, ошол эл бактылуу; Ал кайсы урууну Өзүнө мурас кылып тандап алса, ошол уруу бактылуу.

¹³Теңир асмандан карап, бүткүл адам баласын көрүп турат.

¹⁴Ал Өзү отурган тактыдан жерде жашагандардын баарын көрүп турат.

¹⁵Ал алардын бардыгынын жүрөгүн жараткан, алардын бардыгынын иштерин билет.

¹⁶Падыша сансыз аскери менен куткарыла албайт; алпты зор күчү сактай албайт.

¹⁷Куткарат деп, атка ишенүүгө болбойт, ал өзүнүн чоң күчү менен да куткара албайт.

¹⁸Мына, Теңирдин көзү Өзүнөн корккондордун жана Өзүнүн ырайымына таянгандардын үстүндө.

¹⁹Теңир алардын жанын өлүмдөн сактап каларына, ачарчылык убагында тойгузарына ишенишет.

²⁰Жаныбыз Теңирге таянат. Ал биздин жардам берүүчүбүз, калканыбыз.

²¹Аны менен жүрөгүбүз кубанат, анткени биз Анын ыйык ысымына таянабыз.

²²Сага таянгандыктан, ырайымың биздин үстүбүздө болсун, Теңир.