Read Кыргыз тилиндеги Библия, 2004 Забур 33 Bible Online

Забур 33 - Кыргыз тилиндеги Библия, 2004 bible

Забур 33

¹Абы-Мелектин алдында келесоо болумуш болуп, андан кутулгандагы Дөөттүн забуру.

²Теңирди ар убакта мактаймын, оозумдан түшүрбөй даңктаймын.

³Жаным Теңир менен мактанат, аны момундар угуп кубанат.

⁴Мени менен бирге Теңирди мактагыла, Анын ысымын баарыбыз бирге даңазалайлы.

⁵Мен Теңирди издедим, ошондо Ал мени угуп, бардык коркунучтан куткарды.

⁶Ага кайрылгандардын көздөрү ачылды, алар уятка калышпайт.

⁷Азап чегип жаткан адам чакырганда, Теңир угуп, аны бардык азаптарынан куткарды.

⁸Теңирдин периштеси Кудайдан корккондорду курчап турат, аларды куткарат.

⁹Татып көргүлө, ошондо Теңирдин кандай жакшы экенин көрөсүңөр! Теңирге таянган адам бактылуу!

¹⁰Теңирден корккула, Кудайдын ыйыктары, анткени Кудайдан корккондор эч нерсеге муктаж болушпайт.

¹¹Жаш арстандар жокчулуктун каарын тартып, ачка калышат, ал эми Теңирди издегендер эч бир жакшы нерседен кур калышпайт.

¹²Келгиле, балдарым, мени уккула. Силерге Теңирден коркууну үйрөтөм.

¹³Эгерде адам жашагысы келсе, жыргал турмушту көрүп, узак өмүр сүргүсү келсе,

¹⁴анда тилин жаман сөздөн, оозун жалган сөздөн сактасын.

¹⁵Жамандыктан баш тартып, жакшылык кыл. Тынчтыкты издеп, ошого умтул.

¹⁶Теңирдин көздөрү адил адамдарды көрүп турат, кулагы алардын зар-муңун угат.

¹⁷Бирок Теңирдин жүзү жамандык кылгандарга каршы, алардын ысымын жер үстүнөн биротоло өчүрөт.

¹⁸Адил адамдар чакырганда, Теңир аларды угуп, бардык кыйынчылыктарынан куткарат.

¹⁹Теңир чын дилинен өкүнгөндөргө жакын, моюн сунгандарды куткарат.

²⁰Адил адамдын кайгысы көп, бирок Теңир аны бардык кайгысынан куткарат.

²¹Ал анын бардык сөөктөрүн сактайт, бир да сөөгү сынбайт.

²²Күнөөкөрдү жамандык өлтүрөт, адил адамды жек көргөндөр ойрон болушат.

²³Теңир Өз кулдарынын жанын куткарат, Ага таянгандардын бири да өлбөйт.