Read Кыргыз тилиндеги Библия, 2004 Забур 34 Bible Online

Забур 34 - Кыргыз тилиндеги Библия, 2004 bible

Забур 34

¹Дөөттүн забуру. Теңир, мени менен күрөшкөндөр менен күрөш, мени менен согушкандар менен согуш.

²Калкан, соот алып, мага жардамга кел.

³Кылычыңды кынынан сууруп, мени кууп келе жаткандардын жолун торо. Менин жаныма: «Сенин куткаруучуң Менмин!» – деп айт.

⁴Мени өлтүргүсү келгендер уятка калышсын, шылдың болушсун. Мага жамандык каалагандар артына качып, абийири төгүлсүн.

⁵Алар шамал сапырган самандай болушсун, Теңирдин периштеси аларды кууп жиберсин.

⁶Алардын жолу караңгы жана тайгак болсун, Теңирдин периштеси аларды куугунтуктасын.

⁷Анткени алар мага себепсиз ор казышкан, тор жайышкан. Менин айыпсыз жаным үчүн көр казышкан.

⁸Ага күтүлбөгөн өлүм келсин, мага жашыруун жайган торуна өзү түшсүн, торуна өзү түшүп өлсүн.

⁹Ал эми менин жаным Теңир менен кубанат, Анын куткарганына шаттанат.

¹⁰Менин бүт сөөктөрүм: «Теңир! Күчсүздү күчтүүдөн сактаган, жарды менен жакырды каракчыдан куткарган Сендей ким бар?» – дейт.

¹¹Жалган күбөлөр мага каршы чыгышты: мен билбегендерди сурап, суракка алышты.

¹²Жакшылыгым үчүн алар мага жамандык кылып, жанымды жалгызсыратышты.

¹³Мен алар ооруп жатканда, зумбал кийип, өз жанымды орозо кармап кыйнадым, башымды көтөрбөй, кайра-кайра сыйындым.

¹⁴Аларга досумдай, бир тууганымдай мамиле кылдым. Энесине аза күткөн адамдай кайгыга батып, башымды шылкыйтып жүрдүм.

¹⁵А мен мүдүрүлүп кеткенде, алар кубанып, топтошо калышты; мени тилдегендер мага каршы чогулушту, мени эмне үчүн токтоосуз кордоп жатышканын билбейм.

¹⁶Алар эки жүздүүлөнүп, мени шылдыңдап, тиштерин кычыратышты.

¹⁷Теңир! Муну качанга чейин карап тура бересиң? Жанымды алардын кыянаттыгынан куткар, жалгыз жанымды арстандардын азуусунан куткар.

¹⁸Мен Сени чоң жыйында даңктайм, өтө көп элдин ортосунда даңазалайм.

¹⁹Мага себепсиз кас болуп жүргөндөр мени табалап карап турушпасын, мени айыпсыз жек көргөндөр табалап, бири-бирине көз кысышпасын.

²⁰Анткени алар тынчтык жөнүндө сүйлөшүп жатышкан жок, тескерисинче, жерде тынч жашагандарга жамандык кылууну ойлонуштуруп жатышат.

²¹Мени карап алып: «Ии-и! Ии-и! Өз көзүбүз менен көрүп жатабыз!» – деп табалап жатышат.

²²Сен муну көрдүң, Теңир, унчукпай койбо. Менден алыстаба, Теңир.

²³Кудайым, Теңирим, ордуңан тур, мени актоо үчүн, мени коргоо үчүн ойгон!

²⁴Мени Өзүңдүн акыйкаттыгың менен акта, Теңирим, Кудайым, алар мени табалашпасын.

²⁵Өз ичтеринен: «Ырас болду! Табабыз канды!» – дешпесин. «Биз аны жуттук», – дешпесин.

²⁶Башыма кыйынчылык түшкөнүнө табасы канып кубангандар уятка калышсын, шылдың болушсун. Мага менменсингендердин абийири төгүлсүн, уят болушсун.

²⁷Менин акталышымды каалагандар кубанып, салтанат куруп, тынбай: «Өз кулуна тынчтык каалаган Теңир даңазалансын!» – дешсин.

²⁸Менин тилим Сенин чындыгыңды жар салып, ар күнү Сени даңазалайт.