Read Кыргыз тилиндеги Библия, 2004 Забур 36 Bible Online

Забур 36 - Кыргыз тилиндеги Библия, 2004 bible

Забур 36

¹Дөөттүн забуру. Зулумдарга ачууланба, мыйзамсыз иш кылгандарга суктанба.

²Анткени алар тез эле чөптөй куурашат, көк чөптөй соолушат.

³Теңирге таян, жакшылык кыл, жер үстүндө жаша, чындыкты сакта.

⁴Теңир менен кубан, ошондо Ал жүрөгүңдөгү каалоолорду ишке ашырат.

⁵Теңирге өз жолуңду тапшыр, Ага таян, ошондо Ал ишке ашырат.

⁶Чындыгыңды жарыктай, адилеттигиңди чак түштө тийген күндөй кылат.

⁷Теңирди унчукпай күт, Андан үмүттөн. Өз жолунда ийгиликке жеткен, арам ойлорун ишке ашырган адамга атаандашпа.

⁸Ачууңду токтот, кыжырланба. Жамандык кылганга чейин барбаш үчүн, атаандашпа.

⁹Анткени жамандык кылгандар кырылышат, ал эми Теңирден үмүттөнгөндөр жерди мураска алышат.

¹⁰Бир аз убакыт өткөндөн кийин кудайсыз жок болот, анын ордун карап, таппай каласың.

¹¹Ал эми момундар жерди мураска алышат да, тынч турмушка ыракаттанышат.

¹²Кудайсыз адам адил адамга жамандык издеп, тиштерин кычыратып турат.

¹³Теңир болсо ага күлөт, анткени Ал анын күнү жакын калганын көрүп турат.

¹⁴Кудайсыздар жарды менен жакырды кулатуу үчүн, түз жолдо бара жаткандарды өлтүрүү үчүн, кылычтарын кындан сууруп, жааларын атууга даярдап турушат.

¹⁵Алардын кылычы өздөрүнүн жүрөгүнө сайылат, жаалары сынат.

¹⁶Адил адамдын аз нерсеси кудайсыздардын сансыз байлыгынан артык.

¹⁷Анткени кудайсыздардын күчү талкаланат, ал эми адил адамдарды Теңир колдойт.

¹⁸Теңир күнөөсүздөрдүн күндөрүн билет, алардын байлыгы түбөлүк турат.

¹⁹Алар оор күндөрү уятка калышпайт, ачарчылык күндөрү ток болушат.

²⁰Ал эми кудайсыздар өлүшөт, Теңирдин душмандары козунун майындай жок болот, түтүндөй тарап кетет.

²¹Кудайсыз карыз алат, бирок кайрып бербейт, ал эми адил адам ырайым кылат жана берет.

²²Анткени Кудайдын батасын алгандар жерди мурастап калышат, ал эми Анын каргышына калгандар кырылып жок болушат.

²³Эгерде адамдын жолу Теңирге жакса, Ал аны бекемдейт.

²⁴Ал жыгылып бара жатса да, кулабайт, анткени Теңир аны колунан кармап турат.

²⁵Мен жаш болгом, эми карыдым, бирок адил адамды Кудай таштап койгонун же анын балдарынын нан сурап жүргөнүн көргөн жокмун.

²⁶Адил адам ар күнү боор ооруп, карыз сурагандарга берет, ошондуктан анын укум-тукуму бата алат.

²⁷Жамандыктан кач, жакшылык кыл, ошондо түбөлүк жашайсың.

²⁸Анткени Теңир чындыкты сүйөт, Өзүнүн ыйыктарын таштабайт. Алар түбөлүк сакталышат, ал эми кудайсыздардын тукуму кырылып жок болот.

²⁹Адил адамдар жерди мурастап, анда түбөлүк жашашат.

³⁰Адил адамдын оозунан акылдуу сөздөр чыгат, тили чындыкты сүйлөйт.

³¹Кудайдын мыйзамы анын жүрөгүндө, анын буттары тайыбайт.

³²Кудайсыз адам адил адамдын артынан аңдып, аны өлтүрүүнүн жолун издейт.

³³Бирок Теңир адил адамды анын колуна бербейт, ал соттолуп жатканда, анын айыпталуусуна жол бербейт.

³⁴Теңирден үмүт кыл, Анын жолунан чыкпа. Ошондо жерди мурастап калышың үчүн, Ал сени сактап жүрөт. Кудайсыздардын кырылып жатканын өз көзүң менен көрөсүң.

³⁵Мен мыйзамсыз, зулум адамды көрдүм, ал тамырын жайган бутактуу дарактай эле.

³⁶Бирок ал өтүп кеткен, эми ал жок. Аны издедим, бирок таппай койдум.

³⁷Күнөөсүз адамды байкап жүр, адил адамды карап жүр, анткени андай адамдын келечеги – тынчтык.

³⁸Ал эми мыйзамсыздардын баары кырылат, кудайсыздардын келечеги ойрон болот.

³⁹Адил адамдардын куткарылышы Теңирден, кайгы учурунда Теңир алардын коргоочусу.

⁴⁰Теңир аларга жардам берет, аларды куткарат. Аларды кудайсыздардан куткарып алат, аларды сактап калат, анткени алар Теңирге таянышат.