Read Кыргыз тилиндеги Библия, 2004 Забур 37 Bible Online

Забур 37 - Кыргыз тилиндеги Библия, 2004 bible

Забур 37

¹Дөөттүн забуру. Эске түшүрүү үчүн.

²Теңир! Мени каарданып ашкерелебе, ачууланып жазалаба.

³Анткени Сенин жебелериң денеме сайылып турат, Сенин менин үстүмдөгү колуң оор болуп жатат.

⁴Сенин каарыңдан денемдин бир да соо жери жок. Күнөөлөрүмдүн айынан сөөктөрүмдө тынчтык жок.

⁵Анткени мыйзамсыз иштерим башымдан ашып, оор жүк сыяктуу мага салмагын салып турат.

⁶Акылсыздыгымдан жараларым ириңдеп, сасып жатат.

⁷Бүкүрөйүп, таптакыр башымды көтөрө албай калдым, таңдан кечке кайгы тартып жүрөм.

⁸Анткени ичим толтура илдет, денемдин соо жери жок.

⁹Алсырап, аябай кыйналып жатам, жүрөгүм сыздагандан кыйкырып жатам.

¹⁰Теңир! Менин каалоомдун баары Өзүңө белгилүү, менин онтогонум да Сенден жашыруун эмес.

¹¹Жүрөгүм титиреп жатат, күчүмдү жоготтум, көзүм да тунарып калды.

¹²Досторум менен санаалаштарым илдетимди көрүп, менден оолактап калышты, жакындарым да алыс турушат.

¹³Мени өлтүргүсү келгендер болсо торлорун жайып жатышат, мага жамандык каалагандар мени өлтүрүү жөнүндө сүйлөшүп жатышат, ар күнү айла-амал ойлоп жатышат.

¹⁴Ал эми мен дүлөйгө окшоп эч нерсе укпайм; дудукка окшоп оозумду ачпайм.

¹⁵Кулагы укпаган, оозунда жообу жок адамга окшоп калдым.

¹⁶Анткени мен Сенден үмүттөнөм, Теңир. Сен мага жооп бересиң, Теңирим, Кудайым менин.

¹⁷«Душмандарым мени көрүп кубанышпасын. Бутум шилтенбей калса, алар мага кыйынсынышат», – дедим.

¹⁸Анткени жыгылганы калдым, жаным кыйналып турат.

¹⁹Мен өз айыбымды мойнума алам, күнөөм үчүн кайгырып жатам.

²⁰Душмандарым болсо жашап жүрүшөт, күч алып жатышат, мени себепсиз эле жек көргөндөр көбөйүп жатат.

²¹Менин жакшылыгыма жамандык кылгандар да жакшы нерсеге умтулганым үчүн, мага каршы чыгып жатышат.

²²Теңирим, Кудайым, мени таштаба, менден алыстаба.

²³Мага жардам берүүгө шашыл, Теңирим, менин Куткаруучум!